АКШ генералы: Кабул өкмөтү «Талибан» чабуулуна туруштук бере албайт
АКШ Борбордук күчтөрүнүн командачысы генерал Жозеф Вотелдин ордуна дайындалган генерал-лейтенант Кеннет Маккензи АКШ Сенатынын куралдуу кызматтар комитетинде баяндама жасады. Маккензинин билдиришинче, АКШнын азырынча Афганистандан күчтөрдү алып чыгуу планы жок. АКШ армиясы Кабул өкмөтүн колдоону улантат.
Афганистан тууралуу баяндама жасаган Маккензи АКШ күчтөрү Афганистанда канчага чейин турушун билбестигин кошумчалады.
АКШ генералы, АКШ күчтөрү болбосо, Кабул өкмөтүнүн коопсуздук күчтөрүнө өтө кыйын болушун, эгерде АКШ күчтөрү чыгып кетсе Кабул өкмөтү «Талибан» чабуулуна туруштук бере албай тез эле жеңилип калышын билдирди. Ошого карабастан, АКШнын Афганистанда аскерлерди көбөйтүү ниети жок экендигин белгиледи.
АКШда жайгашкан «Стратфор» изилдөө борбору Афганистан боюнча 2019-жылга карата божомолдорду камтыган жаңы отчёт жарыя кылды. “Стратфор”дун божомолунда, АКШ 2019-жылы да Афганистанда калып, сүйлөшүүлөр стратегиясын улантат.
Америкалыктардын «Талибан» кыймылы менен баштаган сүйлөшүүлөр жараянында Афганистандан чыгып кетүү жөнүндө анык бир чечим кабыл алынган эмес.
АКШнын 2001-жылы Афганистанга баштаган баскынчылыгы АКШ экономикасына кеминде 1 триллион доллар зыян жеткирип, оң миңдеген аскерлер каза болуп, же майып болуп калганы айтылып келет. АКШ жооптуулары билдиргендей, 2018-жылы Афганистан согушуна АКШ бюджетинен 45 миллиард доллардан ашык каражат жумшалган.
