Эрдоган: Түркиянын кыйроосун күткөн көптөгөн душмандар бар
Түркиянын борбору Анкара шаарында өткөн жылдын 15-июлунан 16-июлга караган түнү жүз берген төңкөрүш бастырылгандыгынын бир жылдыгына байланыштуу чогулган элдин алдында президент Режеп Таййип Эрдоган сөз сүйлөдү. Бир жыл мурда т.а. 2016-жыл, 16-июль, саат 02:30да Түркия парламентинин имаратын козголоңчулар бомбалаган эле.
Эрдоган Түркиянын кыйроосун тышкарыда көпчүлүк күтүп тургандыгын билдирди.
Эрдоган: “Көптөгөн душмандар Түркиянын кыйроосун күтүүдө. Эгерде мен алардын атын атай баштасам, бул нерсе кеңири масштабдагы эл аралык кризиске алып барышы мүмкүн”,- деди.
Ал төңкөрүштү уюштургандыкта айыпталган оппозиционер Фетхулла Гүлен учурда АКШда экендигин жана анын Пенсильвания штатында өтө чоң өлчөмдө байлыгы бар экендигин айтып өттү.
Эрдоган 2016-жылдын июлунда козголоң бастырылганы себептүү чыккынчылар 40 жыл даярдык көргөн план 20 саатта жокко чыккандыгын айтып өттү жана муну “жалпы элдин жеңиши” деп атады.
