Чөгүп жаткан кемеге чыккан адам кутула албагандай эле, Россиянын демилгеси менен түзүлгөн Евразия экономикалык биримдигине мүчө болгон Казакстандын экономикасындагы кризистер да күндөн-күнгө күчөп бара жатат. Бул кризистин алдын алуу жана бюджеттеги дефициттин ордун толтуруу үчүн болсо казак өкмөтү үнөмдүүлүк саясатын колдонууга мажбур болууда.
23-ноябрь күнү Астана шаарында болуп өткөн өкмөттүн кеӊейтилген жыйынында Казакстан президенти Нурсултан Назарбаев чогулгандарды казакстандыктардын чыгымдарын үнөмдөө чаралары тууралуу ойлонууга чакырды.
Назарбаевдин айтымында, казак базары Россияга каршы колдонулган жаза-чаралардан зыян көргөнү сыяктуу эле, рублдин курсу төмөндөп кетишинен да зыян тартып жатат. Россиянын Борбордук банкынан кийин Казакстан да теӊгенин курсун эркин коё берүүгө мажбур болду, бул болсо өз кезегинде чыгымдардын көбөйүшүнө алып келди.
Россиядан Казакстан базарларына көп өлчөмдө автомобиль жеткирип берилиши казак автомобиль куруу тармагына катуу сокку болду. Ушуга байланыштуу Назарбаев эскертип: “Акыры биз ЕАЭБге жана ал бизге зыян жеткирбеши керек. Дал ушундай шартта ЕАЭБдеги айрым мамлекеттерде чегараларды жабуу туурасында кеп-сөздөр пайда болот. Т.а. мамлекеттин кызыкчылыктары, ар кайсы мамлекеттин экономикасы бардык нерседен маанилүү болуп эсептелет. Муну эстен чыгарбашыбыз керек”, – деди.
Бул проблемалардан кутулуу үчүн Назарбаев калкты жергиликтүү продукцияларды сатып алууга чакырууда. Алма-Ата шаарында уюштурулган орто жана ири жеӊил өнөржай ишканаларынын көргөзмөсү менен таанышкан Назарбаев калк тарабынан жергиликтүү ишкердикти колдоп-кубаттоо маанилүү экендигин белгилеп өттү.
“Мен бардык казакстандыктарга жергиликтүү продукцияларды, ошону менен бирге, “мade in Kazakhstan” деген белгиси бар бут кийим жана костюмдарды сатып алгыла деп айтууну каалайт элем. Эгерде жеңил өнөржай продукцияларына талап көбөйө турган болсо бул тармакта иштеп жаткан адамдар айлык алышат жана мамлекетке салык төлөшөт. Бул бардыгы үчүн пайдалуу болуп, бюджеттин кирешеси көбөйөт, мамлекетте жергиликтүү продукциялар пайда болот”, – деди Назарбаев.
