Афганистанда авиа соккулардын натыйжасында жайкын тургундар каза болду
“Пажвак” маалымат агенттигинин кабарына таянсак, Афганистандын батышында авиа соккулардын натыйжасында жок эле дегенде 9 адам каза болуп, 20 чакты адам жарадар болгон.
Окуя Фарах провинциясындагы Бала Булук округунда жума күнү жүз берген. Жергиликтүү оорукана кызматкеринин кабар беришинче, жаш балдар курман болуп, жарадар болгондордун арасында аялдар да бар жана алардын абалы оор.
Губернатордун орун басары Мухаммад Юнус Расули болсо өлгөндөр боюнча таптакыр башкача маалыматтарды берген. Ал төрт адам өлүп, беш адам жарадар болгондугун кабарлаган. Бирок, авиа соккулар ким тарабынан болгондугу туурасындагы суроого жооп берген эмес. Агенттик “Twitter” баракчасында жарыя кылышынча, авиа сокку афган аскерлери тарабынан ишке ашырылган.
Расули: “Окуя жума күнү жүз берди. “Талибан” кыймылы кагышуулар учурунда коргонуу максатында карапайым калктан калкан катары пайдаланат”, – деди. Анын айтымында, акыркы үч күндүн ичинде коопсуздук күчтөрү кеңири масштабдуу операцияларды өткөргөн.
Авиа соккудан жабырланган Ахмад Шах агенттикке кеңири маалымат берди. Ал: “Жар Ахунд районунан жеткенибизде эки вертолёт келди, биз машинадан бардык аялдарды чыгардык, карапайым жарандар экендигибизди көрсөтүү максатында ушундай кылдык, бирок, алар бизге карата ок чыгарышты”, – деди.
