Бишкекте КМШ мамлекет башчыларынын саммити өтөт
Президенттик аппараттын тышкы саясат бөлүмүнүн башчысы Сапар Исаковдун брифинг учурунда маалымдашынча, 16-17-сентябр күндөрү Бишкек шаарында болуп өтө турган КМШ саммитине Азербайжан, Армения, Беларусь, Казакстан, Тажикистан жана Россия президенттери келишет.
Мындан тышкары, саммитке Молдова премьер-министри, Өзбекстан тышкы иштер министри, Түркмөнстан министрлер кабинети төрагасынын орунбасары, Украинанын элчиси катышат.
Исаковдун айтышынча, Өзбекстан президентинин милдетин аткаруучу Шавкат Мирзиёев мамлекеттин ички иштери менен алектиги себептүү саммитке бара албашын билдирген.
“Бүгүн биз Шавкат Мирзиёевден жылуу маанайдагы кат алдык. Өзбекстан азыр ички иштери – шайлоолор менен алек. Мунун өз ара мамилелерге эч кандай байланышы жок”,- деди Исаков.
КМШ юбилейлик саммитинде 16 маселе каралмакчы.
Туркистон:
Дүйнөдө таасир кубатын жоготкон же таптакыр иш жүргүзө албаган жүздөгөн уюмдар бар. КМШ да ошол уюмдар катарына кирет. Бишкектеги саммит да расмиятчылык үчүн болгон адаттагы жана кезектеги расмий учурашуу. Бул жолугушуудан бирер маанилүү же таасирдүү токтом күтүп болбойт.
