Милициянын майору адам уурдагандыкта шектелип, камакка алынды
Буга чейин белгилүү болгондой, бир ай мурун Ош шаарында Кытайдан келген жеке ишкер дайынсыз жоголгон болчу. Буга байланыштуу Кытайдын Ош шаарындагы консулу анын табышмактуу жагдайда жоголгонуна кабатыр болуп, издөөгө көмөк сурап, кыргыз бийлигине кайрылган. Иликтөө иштеринин жүрүшүндө бул адам уурдоо фактысына тиешеси бар жана негизги шектүү адам катары Жалал-Абад облустук ички иштер башкармалыгынын 10-бөлүмүнүн бөлүм башчысы Бекжан Ажыкулов кармалды.
Милициянын майору Бекжан Ажыкулов Жалал-Абад облустук ички иштер башкармалыгынын мыйзамсыз миграцияга, экстремизмге жана терроризмге каршы күрөшүү бөлүмүнүн башчысы болчу. Ага былтыр “Кесибинин мыктысы” наамы ыйгарылып, ал Ардак грамота жана акчалай сыйлык менен сыйланган.
Ош шаардык сотунан анын бөгөт чарасы катары 20 күнгө санкция берилди.
Ошто убактылуу жашап, ишкердик менен алектенген уйгур улутундагы Кытайдын Али аттуу жараны быйыл 24-июнда “жума намазга барам” деп үйдөн чыгып кеткен боюнча кайтып келген эмес. Кийин анын автоунаасы шаардын Салиева көчөсүндөгү Барпы мектебинин жанынан табылган. Жергиликтүү кызга үйлөнгөн Али эки баланын атасы болгон. Алинин уурдалышына шектелип, милиция майору кармалган 27-июль күнү алардын үй-бүлөсүндө үчүнчү бала жарыкка келди.
Жоголгон ишкердин туугандары милицияга арызданып, ошол эле кезде өз алдынча да издей башташкан.
Алинин тирүү же тирүү эместигин билүүнү каалаган туугандары 27-июль күнү Ош шаардык сотунун алдына чогулушту.
Туркистон:
Кыргызстан мамлекети ишенбөөчүлүк көрсөтүү керек болгон мамлекетке айланып барууда. Өткөн жылы президенттин апарат башчысы менен бир депутат камакка алынышты. Алар түрмөдө отурган Бишкектин мурдагы мэринин кызынан 100 миӊ доллар пара алып жатып кармалышкан болчу. Мындан бир аз мурда, Кыргызстандын парламентин бир нече жыл башкарып келген “Жогорку Кеңештин” спикери камакка алынды. Ал да, мамлекеттик мүлктү өз кызыкчылыгы жолунда иштеткендикте айыпталган. Акаев да, Бакиев да жана алардын айланасындагылар да, миллиарддаган акчаларыбызды алып чыгып кетишти. Алар ошол бизден уурдап алып кетишкен акчалары менен дагы кайрадан бийликти ээлеп жатышат. Бакиевчилер кайра эле министр, депутат, губернатор болуп бийликте жүрүшөт.
Милиция кызматкерлери акыркы кездерде өтө көптөгөн кылмыштарды кылып жатышат. Алар Ошто ал тургай бандит жана рекеттер менен аралашып, милиция кызматкерлери болгон бандиттик группаларга айланып бара жатышат. Спорттук клубдар да жогорку кызматтагы орган кызматкерлеринин демөөрчүлүгү астында иш алып барышат. Алар кылып жаткан кылмыштардын дээрлик бирөө да ачылган эмес. Мисалы, соодагерлердин миллиондогон акчалары уурдалып, тонолду. Бири да табылган жок. Себеби, бул сыяктуу ыпылас иштерди ушул сыяктуу ыпылас орган кызматкерлери кылышат. Түпкүлүгүндө, алар спорт менен машыккан бандит жигиттер болуп, аларга орган күбөлүгү элди тоноп жатканда расмийчилик үчүн жана коргонуу үчүн гана керек. Булардын демөөрчүлөрү болсо, министрликке карай көтөрөлүп бара беришет. Себеби, өкмөткө айырмасы жок, шайлоодо же тартипти сактап турууда элди басым астында кармап туруучу күч болсо болду. Алар элге зулум кылуу менен тартипти сакташабы, мыйзамга моюн сунушабы же жокпу, айырмасы жок. Маанилүүсү, шайлоодо добуш алып беришсе жана элдин үнүн чыгарбай турушса болду.
Жогорудагы кылмышкер, органдын ардактуу кызматкери экен. Кыргызстанда 10-бөлүмдүн кызматкерлери өтө байып кетишти. Алар негизинен кытайлык уйгурлардын акчаларын ар түрдүү жолдор аркылуу тартып алуу менен байып жатышат. Уйгур боордошторубуз алар талап кылган каражатты убагында таап бере алышпаса, аларды ар түрдүү шантаж жолдору менен коркутушат. Мисалы, алар “10-бөлүмдүн Кытай коопсуздук кызматы менен байланышы бар, биз силерди экстремисттик топторго байланышы бар деп жазып беребиз” деп коркутушат. Ошондо да болбосо, кийин аларга башка материалдык басым өткөрө башташат. Бул нерсе элдин баары билген акыйкат.
Өкмөттүн т.а. министрлердин бул иштерге көз жумушунун себеби, бул иштерге алардын өздөрү демөөрчү жана шерик болушат. Себеби, бул кызматкерлер ыпылас жолдор менен тапкан акчаларды жогорудагылар менен бөлүшөт.
Бирок, бул коррупциялык механизмдер Кыргызстанды ондогон жылдарга артка тартты. Дүйнөлүк базарлар деп аталган ири базарлар жабылуунун астында турат. Чет өлкөлүк соодагерлер мамлекеттен чыгып кетишти. Калгандары болсо, орган кызматкерлерине төлөп келген акчаларды төлөй албай калышты. Буларга ишенип чоӊ-чоӊ үйлөрдү баштап койгон, же банктардан кредиттерди алып койгон 10-бөлүмдүн кызматкерлери Бекжан Ажыкуловго окшоп кылмыш кылганга чейин барып жатышат.
Өкмөттүн ыпылас коррупциялашкан бир тайпасы болсо “Бишкектин айланасында шектүү адамдар пайда болду” деп, мусулмандардан кооптонуу пайда кылуу менен элди алаксытууга аракет кылып жатышат. Түпкүлүгүндө, азыр милиция жана коопсуздук кызматкерлери өтө кокунучтуу абалга түшүп бара жатышат. Алар жакынкы келечекте абал өзгөрбөсө, жарандардын акыркы тыйындарын тартып алуу үчүн ар кандай кылмышка барышы мүмкүн. Себеби, мамлекеттин ички саясий жана коопсуздук системасы ушуга ылайык көрүнүштө иштелип чыккан. Т.а. орган кызматкерлеринин айлык акылары жетиштүү өлчөмдө эмес. Мусулмандар болсо, мунун тескериси. Алар кырдаал курчуп, жакырчылык күчөгөн сайын бири-бири менен жакындашып, күчтүүлөр алсыздарга жардам берүүгө умтулушат. Мусулмандарды буга Ислам дини үндөйт.
Бузук күчтөр бир мусулмандын бирер туура эмес аракети үчүн бүт мусулмандарды айыптоого аракет кылышат. Орган кызматкерлеринин, министр, депутат же президенттердин кылмыштары үчүн болсо, ошол адамдын өзүн гана айыптуу кылып, калгандары уялбастан ыпылас иштерин уланта беришет. Акыры бир кылмышты мусулман кылса да, кафир же мунафык кылса да натыйжасы өзгөрбөйт го. Т.а. бирер адамды өлтүрсө, аны ким өлтүргөнү маанилүү эмес. “Эмне үчүн өлтүрдү, өлтүргөнгө укугу бар беле, чектен чыктыбы” маселенин ушул тарабы маанилүү. Аны бирер сакалдуу мусулман өлтүрсө, бул коомго коркунуч туудурат экен да, милиция кызматкери өлтүрсө эч кандай коркунуч жок имиш. Акыры бул орган кызматкерлерин биз өзүбүз үчүн коргоочу кылып жалдаганбыз го. Алар ишенимсиз болушса, эмне үчүн биз аларга ишене беришибиз керек. Мусулмандарды болсо, шектүү адамдар деп кылмыш жоопкерчилигине тартып жатышат. Алардын кылмыштарына шерик деген шылтоо менен досторун жана жакындарын да тергөөгө алып жатышат. Бул кандай эки стандарттуу саясат. Эл аралык уюмдар, сот жана укук коргоочулар сокур болуп калышканбы?
