Талибан Анкарага Кабул аэропортун башкарууну сунуштады

Талибан Анкарага Кабул аэропортун башкарууну сунуштады

“Талибан” Анкарага Кабул эл аралык аэропортунун жарандык башкаруусун колго алууну сунуштады. Бул тууралуу Түркиянын президенти Режеп Тайып Эрдоган маалымат жыйынында айтканын Anadolu агенттиги кабарлады.

“Талибдер Кабул аэропортун башкарууну бизге сунуштады. Коопсуздукту камсыздай турганын айтышты. Ал эми аэропорттогу жарандык жөнгө салуу иштери менен алектенүүнү бизге сунуштап жатышат. Биз азырынча жооп бере элекпиз”, – деди Эрдоган.

Эрдогандын билдирүүсүнүн алдында Кабул эл аралык аэропортуна жакын жерде теракт болуп жүздөн ашуун адам каза таап, 150 киши жаракат алган. Бул окуяга чейин Американын президенти Жо Байден “Ислам мамлекети” уюму Ооганстандагы канаты кол салышы мүмкүн экенин эскерткен. Ал эми Британиянын куралдуу күчтөр министри Жеймс Хеппи согушкерлер аэропорттун аймагында чабуул уюштурууну көздөп жатканы тууралуу «абдан ынанымдуу» маалыматтар бар экенин билдирген.

Мындан белгилүү болгондой, теракт окуясы алдын ала пландалган иш болгон. Максат, Талибан менен ИГИЛдин ортосунда чыр чыгаруу жана Талибан коопсуздукту камсыздай албайт деген коомдук пикир пайда кылуу. Эми мунун артынан Америка Эрдоганды ишке салуу менен Кабул аэропортун ыңгайлуу колдонууга шарт жаратып алууну көздөп жатат.

Мумтаз Маверанахрий