АКШ Иран боюнча ядролук келишимден чыкты
АКШ Ирандын ядролук программасы боюнча “Кеңири биргелешкен иш-аракет планы” (JCPOA) деген келишимден чыгат. Бул тууралуу АКШ президенти Дональд Трамп 8-майда Вашингтондо жарыялады.
“Келишим Иранга ядролук программасын кеңейтүү мүмкүнчүлүгүн берди. Келишимдин негизи куру кыялдардан турат эле. Бизде Ирандын убадалары жалган экендигин далилдөөчү фактылар бар. Бул тынчтык алып келбеген бир тараптуу чечим эле. Бул келишим эч качан тынчтык алып келбейт. Эгерде мен келишимде калууга шарт түзүп берсем, анда бүтүндөй Жакынкы Чыгышта ядролук куралга ээ болуу атаандаштыгы башталып кетет. Мен АКШнын ядролук келишимден чыгышын жарыя кылам”, – деди Трамп.
АКШ президентинин айтымында, Иран расмийлери аталган келишимдин талаптарын кайрадан карап чыгуудан баш тартышкан. О.э. эгерде расмий Тегеран пикиринен кайтса, анда диалогго даяр экендигин, жаңы талаптар негизинде кайрадан келишим түзүүгө ыраазы экендигин билдирди.
Трамптын билдиришинче, ал Иранга каршы санкцияларды кайрадан киргизген буйрукка тез арада кол коёт.
Ал Иранды терроризмге демөөрчү, “Хизбулла”, “Хамас”, “Талибан” жана “Ал Каида”ны колдоп-кубаттоочу о.э. өз жарандарын кыйноого салуучу мамлекет деп атады. Ошону менен бир катарда, “Авторитардык режим ээлеп алган ” Ирандын жарандарын колдой тургандыгын билдирди.
Аталган келишимге кол койгон Европа мамлекеттери менен Россия (JCPOA) келишими Иранды тыйып туруу үчүн бирден-бир мүмкүнчүлүк экендигин билдиришкен.
