Серж Саргсян кызматтан кетти
Армения премьер министри Серж Саргсян кызматтан кетти. Бул тууралуу өкмөттүн сайты кабар таркатты.
Анда экс-премьердин “Никол Пашинян туура айтты. Мен туура эмес кылдым. Бул менин ордум эмес. Мен мамлекет жетекчилигин бошотом”,- деп айтканы жазылган.
Учурда Карен Карапетян өкмөттү убактылуу башкарып жатат.
Белгилүү болгондой, Ереванда 13-апрелден бери Серж Саргсяндын премьер министр болуп дайындалышына каршы нааразылыктар уланып келди. Саргсян Арменияны акыркы 10 жыл бою башкарган. Анын президенттик доорунда Армения президенттик республика болчу. Бирок референдум аркылуу конституцияга өзгөртүү киргизилип, өлкө парламенттик республикага айланган. Ошентип ал Арменияны премьер министр болуп жетектей баштаган.
Маалыматка ылайык, 22-апрель күнү Арменияда 100 миңден ашык адам көчөлөрдө нааразылык акциясын убштурган. Бул КМШ өлкөлөрүнүн тарыхында эң ири митинг болуп калды.
