Кыргызстан Өзбекстанга нота жиберди
Кыргызстан Тышкы иштер министрлиги 7-апрелде өзбек-кыргыз чегарасында болгон окуяга байланыштуу Өзбекстанга нота жолдоду. Бул тууралуу Кыргызстан Тышкы иштер министрлиги кабар таркатты.
“ТИМге Өзбекстандын Кыргызстандагы элчиси К.Рашидов чакыртылып окуя тууралуу кабардар кылынды. Ага болгон окуяны түшүндүрүп берүү үчүн нота тапшырылды”,- деп айтылат кабарда.
Учурда аталган министрик бул маселени көзөмөлгө алып жатат жана эки өлкөнүн тийиштүү кызматтары менен алакада.
Буга чейин Кыргызстандын чегара кызматынын маалымат бөлүмү Өзбекстан чегарачылары Кыргызстандын жаранына ок чыгарганын жана ал ооруканада көз жумганын кабарлаган. Учурда окуя болгон жерде чегара кызматынын өкүлдөрү менен укук коргоо органдарынан түзүлгөн топ тергөө иштерин жүргүзүп жатат. Өкмөт башчы Сапар Исақов ишемби күнү тийиштүү мекемелерге “чегарадагы окуяны өзбек тарап менен бирге жакшылап иликтөө” тапшырмасын берди.
