Астанада Сирия боюнча сүйлөшүүлөрдүн кезектеги раунду башталууда
РИА “Новости”нин билдиришинче, Башар Жаафари Сирия өкмөттүк делегациясы Астанага жетип келген. Бул жерде 14-15-март күндөрү Сирия боюнча кезектеги сүйлөшүүлөр өткөрүлөт.
Астанада Сирия боюнча жогорку даражадагы эл аралык жолугушуу шейшемби күнү башталат. Казакстан Тышкы иштер министрлиги кабарлагандай, 14-март күнү алгачкы кеңешүүлөрдү өткөрүү пландаштырылган болсо, 15-мартта жалпы жыйын болот.
Январь айында Россия президенти Владимир Путиндин Астанада Сирия тынчтык жараяны боюнча кошумча сүйлөшүүлөр майданын түзүү туурасындагы сунушун Түркия жана Казакстан президенттери колдоп-кубатташкан. Астанада Сирия боюнча сүйлөшүүлөрдүн биринчи баскычы 23-24-январь күндөрү болуп өттү. 15-16-февраль күндөрү өткөрүлгөн экинчи баскычта Сириядагы келишим боюнча Иран, Россия, Түркия катышуусундагы мониторинг кылуучу топ түзүү боюнча келишим түзүлгөн.
РФ куралдуу күчтөрүнүн Башкы штабындагы оперативдүү башкаруу башкармалыгынын жетекчиси Сергей Рудской өткөн аптада 14-15-мартка пландаштырылган жолугушууда Сирия Араб Республикасында “Жабхат ан-Нусра” жана “ИШИМ” террорчу уюмдарынын баарына тиешелүү бирдиктүү карта иштеп чыгуу аякташын билдирген. О.э. туткундарды алмаштыруу боюнча жумушчу топ жана конституциялык комиссия түзүү тууралуу талкуу болушу да болжолдонгон.
