Каримовдун орун басарлары да анын изи менен барат
Өзбекстандын президенти Ислам Каримов өлгөндөн кийин анын ордун ким ээлеши мамлекеттин ичкерисинде да, эл аралык коомчулукта да негизги темага айланды. Өзбекстандын премьер-министри Шавкат Мирзиёев жана премьер-министрдин биринчи орун басары Рустам Азимов президенттикке эң күчтүү талапкерлер катары каралууда.
Борбор Азияда эң таасирдүү өлкө болуп эсептелген мамлекетти 27 жыл башкарган Каримов өлгөндөн кийин, Батыш мамлекеттери жана Россия стратегиялык жактан маанилүү болгону үчүн Өзбекстанда жүз бериши күтүлүп жаткан өзгөрүүлөрдү жакындан күзөтүп турушат.
Франциянын борбору Парижде жашап жаткан Борбор Азия Адам укуктарын коргоо уюмунун башчысы Надежда Атаева Каримовдун мураскорлору да анын анын саясатын улантышынан тынчсызданып жаткандыгын билдирди.
“Ал (Каримов) өз доорунда кылынган кылмыштар тууралуу берилген суроолорго жоооп бербеди. Ал өтө жаман мурас калтырды. Каримовдун мураскорлору анын саясатын улантуу үчүн активдүү аракет кылышат. Бул болсо, мен чыдашым кыйын болгон эң ызалуу нерсе”, — деди Надежда Атаева.
Булак: euronews
