Алмазбек Атамбаев 22-май күнү БУУнун башкы катчысы Пан Ги Мундун чакыруусу менен Биринчи дүйнөлүк гуманитардык саммитке катышуу үчүн Түркияга учуп кетти. Бул тууралуу президенттин маалымат кызматы билдирди.
БУУнун тарыхында алгачкы жолу уюштурулуп жаткан Дүйнөлүк гуманитардык саммитке көптөгөн мамлекеттердин башчылары, гуманитардык тармактагы уюмдардын, эл аралык уюмдардын өкүлдөрү катышат жана анда глобалдык мигранттар проблемасы талкууланат. Саясий келишпестиктердин курмандыгы болуп жаткан адамдардын тагдыры эскерилет. Бул саммит ушундай иш-чаралардын эң алгачкысы болуп калары айтылууда.
Алмазбек Атамбаев бул сапардын алкагында башка делегациялардын башчылары менен эки тараптуу жолугушууларды өткөрөт.
Саммитке Германия канцлери Ангела Меркел, Кувейттин амири Сабах ал-Ахмад ас-Сабах, Нидерландиянын премьер-министри Марк Рютте, Нигерия президенти Мухаммад Юсуф, Ливандын премьер-министри Таммам Салам жана башка мамлекеттердин башчылары катышат.
