Президенттик аппараттын кабар беришинче, Алмазбек Атамбаев ЖККУга мүчө мамлекеттердин бейформал саммитинде катышуу үчүн жөнөп кеткен.
Кыргызстан президенти Россия Федерациясынын президенти Владимир Путиндин чакыруусуна ылайык Жамааттык коопсуздук келишими уюмуна мүчө мамлекеттердин бейформал саммитинде катышуу үчүн 7-май күнү Москвага жетип барды.
8-май күнү Москва шаарында Армения, Белоруссия, Россия, Тажикстан жана Кыргызстандын мамлекет башчыларынын бейформал жолугушуусу болуп өтөт. Бул жолугушуунун алкагында мамлекет жетекчилеринин Россия куралдуу күчтөрүнүн окуу-машыгууларына катышуусу пландаштырылган.
Мындан тышкары, 8-май күнү болуп өтүүчү эки тараптуу жолугушууда Атамбаевдин Путин менен Кыргызстандын Бажы биримдигине мүчө болушу, энергетика долбоорлору жана “Роснефть” компаниясынын “Манас” аэропортун модернизациялоо жараянында катышуусу маселелери боюнча сүйлөшүүсү пландаштырылган.
Президентттик аппараттын тышкы саясат бөлүмүнүн жетекчиси Сапар Исаковдун кабар беришинче, эки тараптуу жолугушуу ЖККУ алкагында пландаштырылган иш-чарадан кийин болуп өтөт.
Сапар Исаков: “Кыргызстандан келген тийиштүү министрлик жана мекеме өкүлдөрүнөн турган жумушчу топ беш күндөн бери Москвада иш алып барууда. Бул топту премьер-министр Жоомарт Оторбаев өзү менен бирге алып келген болчу. Түздөн-түз анын тапшырмасы боюнча Кыргызстандын Бажы биримдигине мүчө болушу туурасында Россия Федерациясы менен эки тараптуу программа иштелип чыгууда. Иш олуттуу көрүнүштө жүрүп жатат деп айта аламын”, – деди.
Туркистон:
Кыргызстандын премьер-министри Жоомарт Оторбаевдин 7-май күнү берген билдирүүсүнө ылайык, ушул күндөрдө экономика министринин орунбасары Даниил Ибраев башчылыгындагы делегация Москва шаарында Кыргызстандын Бажы биримдигине мүчө болуу мөөнөтүн бир жылга кечиктирүү үчүн орус өкмөтүнүн өкүлдөрү менен сүйлөшүүлөрдү жүргүзүүдө.
Анын айтымында, Кыргызстанды Бажы биримдигине мүчө болуп кирүү долббору азырынча даяр эмес. Премьер-министрдин айтымында, өкмөт жакынкы күндөрдө долбоорду даярдап, талкууга алып чыгат.
Оторбаев кошумчалап, мүчө болуу долбоору кыргыз эли тарабынан макулданса жана өкмөт тарабынан тастыкталышы менен бул долбоор Бажы биримдигине мүчө болгон Россия, Казакстан жана Белоруссия мамлекеттерине тастыктоо үчүн жөнөтүлөт.
Премьер-министр алгач Россия башчылык кылып жаткан Бажы биримдигине мүчө болуу мамлекет үчүн “туура ташталган кадам” болушу о.э. көптөгөн экономикалык жана социалдык проблемалардын чечилишине жардам бериши туурасында айтып өткөн эле.
А бирок, Путин башчылыгындагы Россия өкмөтү Атамбаевге эч кандай тандоо мүмкүнчүлүгүн калтырбастан, Бажы биримдигине мүчө болуп кирүүгө Кыргызстанды мажбурлоону улантып келет.
