ЧЫГЫШ ТҮРКСТАНДА 25 МУСЛИМА КЫЗ КАМАККА АЛЫНДЫ.

Чыгыш Түркстанда 25 муслима кыз шариятка ылайык кийим кийип мектепке келгендиги үчүн Кытай коопсуздук күчтөрү тарабынан камакка алынды. Камакка алуу чечимине каршылык билдирген элге болсо ок атуучу куралды колдонуу менен жооп кайтарылды. Натыйжада окуя болгон жерде эки киши шейит болду.

Дүйнөлүк уйгур қурултайынын сүйлөөчүсү Дилшад Рашид бул окуя өткөн аптанын шаршемби күнү Чыгыш Түркстандын Алахожа шаарында болгонун билдирди. Рашиддин айтымында, Кытай жооптуулары бул сыяктуу окуяларды ар дайым массалык маалымат каражаттарынан жашырып келет.

Окуя төмөнкүдөй көрүнүштө жүз берген: Алахожа шаарында жайгашкан мектептин окуучулары болгон уйгур кыздар жоолук салынып мектепке келишкенде мугалимдер алардын жоолуктарын мажбурлап чечүүгө аракеттенишкен. Буга каршылык кылган 25 чакты муслима кыздар Кытай полициясы тарабынан камакка алынышкан. Окуядан кабар тапкан кыздардын жакындары кыздар кармап турулган имараттын айланасына чогулуп, кыздардын чыгарылышын талап кылышкан. Түштөн кийин, саат 16:00 чамасында окуя болгон жерге Кытай полициясынын атайын күчтөрү жөнөтүлгөн. Алар жетип келип, чогулуп турган адамдарга карата ок атышынын натыйжасында эки мусулман уйгур өлгөн. Болгон окуяга айыптуу деп эсептелип дагы 80ден ашык киши Кытай полициясы тарабынан камакка алынган.

22-май күнү Чыгыш Түркстандын борбору Үрүмчүдө жардыруулар жүз берип, натыйжада 39 адам өлүп, 90го жакын адам жарадар болгон эле.