Пакистан АКШга көрсөткөн кызматтарын расмий түрдө моюнга алды
Пакистан тышкы иштер министри Мухаммад Асиф Пакистандын АКШга көрсөткөн кызматтарын жана Пакистан аскерлери АКШ баштаган согушта курман болгондугун расмий түрдө моюнга алды. Асифтин бул билдирүүсү АКШ президенти Дональд Трамптын Пакистанды каралаган билдирүүсүнө жооп иретинде жаңырды. Ал өзүнүн “Твитер” баракчасында кабарлагандай, Пакистан АКШга ишенип ката кылгандыгын тарых далилдеген.
АКШга нааразылыгын билдирген Асиф: “АКШ президенти бизден “эмне кылдыңар?” деп сурап жатат. Биз силерге аскерий базаларыбызды бердик, Афганистандагы АКШ кошуундарын курал-жарак жана ок дарылар менен камсыздоо биздин аймактар аркылуу ишке ашырылды. Миңдеген жай тургундарыбыз жана аскерлерибиз силер баштаган согуш себептүү каза болушту”, – деди.
“Тарых бизге АКШга ишенүүгө болбой тургандыгын көрсөттү. Иш-аракеттерибизден ыраазы болбошуңар мүмкүн, а бирок мамлекетибиздин аброюн түшүрүүгө жол бербейбиз”, – деп кошумчалады Пакистандын тышкы иштер министри.
О.э. Мухаммад Асиф АКШга жардам бергендиги Пакистан үчүн кымбатка түшкөндүгүн да билдирди.
Трамп биринчи январда өзүнүн “Твитер” баракчасында, АКШ ушул кезге чейин Пакистанга 33 миллиард доллар жардам бергендигин билдирип: “Алар биздин жетекчилерибизди акмак деп ойлошту, биз алардан жалган жана алдамчылыктан башка нерсе көрбөдүк. Алар АКШ Афганистанда кысымга алган “террорчулар”ды коопсуз баш баанек менен камсыздап жатат”, – деген эле.
