Жапаров Жакынкы Чыгыштагы кырдаалга кайгыруу менен байкоо салып турганын билдирди
Кыргызстандын президенти Садыр Жапаров Ташкентте болуп өткөн Экономикалык кызматташтык уюмуна мүчө мамлекет башчыларынын саммитинде Палестина-(Израиль) жаңжалы тууралуу сөз кылды.
Жапаров Жакынкы Чыгыштагы кырдаалга көңүлү ооруп, зээни кейип байкоо салып турганын билдирип, тараптарды жай тургундарга карата зомбулукту токтотууга чакырды.
“Биз тараптарды курмандыктарды жана жай тургундарга карата зордук-зомбулукту болтурбоо боюнча комплекстүү чараларды көрүүгө, согуштук аракеттерди тез арада токтотууга жана сүйлөшүү процессин күттүрбөстөн баштоого чакырабыз”, – деди Жапаров.
Комментарий: Палестинадагы кыргындар үчүн кайгыруу мусулман кишинин сыпаты. А бирок, сөздө башка, иште башка болууу жоопкерчиликсиздик экендигинен тышкары, мунафыктыктын белгиси болуп эсептелет. Эгер Жапаров чындап эле Палестина калкына кайгырып жаткан болсо, эмне үчүн анын коопсуздук күчтөрү Палестинанын акысына дуба кылган мусулмандардын үйлөрүндө тинтүү жүргүзүп, ал мусулмандарды камакка алды?!
13-октябрда Ош облусуна караштуу Кара-Суу шаарында жайгашкан “Ас-Сарахси” мечитинде жума намазынан кийин жамааттын алдында Палестинадагы мусулмандардын акысына дуба кылган Мадраимов Асадуллахтын жана анын досторунун үйүндө тинтүү жүргүзүлүп, өздөрү камакка алынышты. Бул иш “терроризм” жана “экстремизм”ге каршы күрөшүүчү мамлекеттик органдар тарабынан ишке ашырылды. Бирок, Айт күндөрүндө айт намаздарын кеңири аянтта, алдыңкы сапта окуу менен адал, таква адам болуп көрүнүүгө аракет кылып келген Жапаров болсо бул тууралуу үн катпады.
Негизи Палестинада кыргын кылынып жаткан мусулмандар үчүн тынчтык жолу менен өткөрүлүп жаткан иш чараларга кайрыдиндер да каршылык кылбай жаткан бир учурда, Кыргызстанда мазлум Палестина калкы үчүн дуба кылган адамдарды камакка алуу Жапаров өкмөтү үчүн чыныгы шерменделик болуп эсептелет. Себеби, дуба – бул ибадат, аны “терроризм” жана “экстремизм” менен байланыштыруу шерменделиктен башка нерсе эмес.
Абдурахман Адилов
