بِسْمِ اللهِ الرَّحْمٰنِ الرَّحِيمِ
Ливандагы сириялык качкындар жана улутчулдардын зулуму!
Сириянын дагы эле Россия, Америка жана улутчул согушкерлердин баскынчылыгы астында калганына карабастан, Ливандагы кээ бир текчил жана улутчул христиан партияларынын сириялык качкындарды өлкөдөн чыгарып, канкор Асад режимине кайтаруу талаптары дагы эле күчөп жатканда, Хизб-ут-Тахрир–Ливан вилаятынын маалымат бөлүмү ушуларды баса белгиледи: «Согуштардагы качкындар маселеси гуманитардык маселе болуп, саясий бийлик тарабынан калыс жана адилеттүү мамиледе болууну талап кылат. Ал эми, Ливандагы саясий бийлик бул качкындардын кыймылын чектөө, аларды кооптуу жана жашоо үчүн жараксыз лагерлерге жайгаштырып аларга ар дайым адилетсиз жана улутчулдук негизинде мамиле кылып келди. Түзүлгөндөн бери ушул абалда болгон бул партиялардын улутчулдук негизиндеги мындай чакырыктары бизди таң калтырбайт. Биз Ливан коопсуздук кызматы өз укугуна тескери жана эч кандай мыйзамдуу негиздерсиз качкындарга согушта көрүлө турган чараларды көрүп жатканына, бул жагдайга өкмөт жана анын министри унчукпай жатканына таң калып жатабыз! Бул болсо, Европа мамлекеттерин шантаж кылуу жөнүндөгү америкалык кожоюндарынын планын ишке ашырууда бийлик жана өкмөттүн колу бар экенин тастыктайт».
Билдирүүдө Ливандагы мусулмандарга кайрылуу жасалып, мындай делет: «Бул өлкө саясатчыларынын иш-аракеттерин жана коопсуздук кызматынын колун сириялыктардан тыйып коюу үчүн аларга басым өткөрүүгө, силер, мусулмандар жоопкерсиңер. Эгер, качкындар мусулман болушпаганда, бул улутчул элитадан мындай аракет болбойт эле! Мисир, Саудия жана Түркия режимдеринин Асад режими менен мамилелерди нормалдаштырышына алданып калбагыла. Бул режимдер Американын буйругу менен аракет кылышат. Американын регион мусулмандарына репрессиячыл мамиледе болуп жатканынын себеби – мусулмандар Мисир, Судан, Сирия, Ирак, Ливан жана Ирандагы Америка малайларына каршы козголоң кылышкандыгы. Ливандагы саясий бийлик качкындарга ушундай улутчулдук саясатты жүргүзүп жаткандыгы да ушул нормалдашуунун бир белгиси».
Билдирүүнүн акырында Ливан өкмөтү мындай саясаттан эскертилип айтылат: «Колонизаторлордун кубаты азая баштады. Алар бардык көрүнүш жана малайлары менен жок кылынмайын исламий өлкөлөрдөгү мусулмандар кадыржам болбойт. Ошондуктан, этият болгула. Себеби, күндөр айланып турат».
Башка жактан, Триполи жетекчилигинин качкын Шам калкы жөнүндө чыгарган токтомдорун четке кагып, Хизб-ут-Тахрир–Ливан вилаяты Триполи жана түндүктөгү улутчулдукту четке кагып жаткан бардык адамдарды бийликке каршы массалык нааразылык демонстрациясын өткөрүүгө чакырды. «Шамдык боордошторубузга болуп жаткан адилетсиз улутчулдукка каршы биз менен бирге болгула» деп аталган бул демонстрация хижрий 1444-жылы 8-шаввалда, миладий 2023-жылы 28-апрелде, жума намазынан кийин болору айтылды.
Учурда Ливан армиясы Набатия шаарындагы качкындар лагеринде бир нече сириялык качкындарды камакка алганын жана эч ким мунун себебин анык билбей жатканда, «Ливан мусулман уламаларынын комитети» ушуларды баса белгиледи: «Качкындар маселеси эл аралык Ислам араб жоопкерчилиги болуп эсептелет. Качкындарды депортациялоо же кылмышкер режимге экстрадиция кылуу чоң күнөө болору менен бирге ахлакый жана мыйзамдуу кылмыш болуп эсептелет. Ал тургай, бул атайылап адам өлтүрүү жана адамзатка каршы кылмыш даражасына жетет». Комитет өз билдирүүсүндө ушуларды кошумчалады: «Бул качкындарды Ливан калкы, расмийлер, араб жана исламий мамлекеттер о.э. бүткүл дүйнө өз кучагына алды, ал тургай, ката жана кемчиликтер болсо да». Кыргын кылган, өч алган жана ойрон кылган тогут жазасыз калбашы керек, арийне, мамилелерди нормалдаштыруу менен сыйланышы да таптакыр мүмкүн эмес деп кошумчалады. О.э. «Ливан мусулман уламалары комитети» бир тууган Сирия калкы тарабында экенин, алардын улуу козголоңун колдоп-кубатташын, ливандыктар менен качкындар арасында жек көрүү жана улутчулдук уругун чачкан билдирүүлөргө каршы экенин билдирди.
Роя гезити, №441, 2023-жыл, 3-май.
