Түркия Афганистандагы тынчтык сүйлөшүүлөрүнө ортомчулук кылат

Түркия Афганистандагы тынчтык сүйлөшүүлөрүнө ортомчулук кылат

Түркиянын президенти Режеп Тайип Эрдогандын билдиришинче, афган өкмөтү менен “Талибан” кыймылынын ортосундагы 17 жылдан бери токтобой жаткан жаңжалды жөнгө салуу боюнча сүйлөшүүлөргө Түркия Пакистан менен биргеликте ортомчулук кылуу ниетинде.

Эрдоган бул тууралуу 4-январь күнү Анкарада Пакистандын премьер-министри Имран Хан менен жолугушуу учурунда билдирди.

Эрдогандын айтымында, үч тараптуу жолугушуу үстүбүздөгү жылдын март айында Стамбул шаарында өткөрүүлөт. Имран Хан күтүлүп жаткан сүйлөшүүлөр көптөгөн жылдардан бери Афганистандын көйгөйү болгон “тынчтык орнотуу маселесине” зор салым кошорунан үмүттөнгөндүгүн билдирди. Бул тууралуу “Associated Press” кабарлады.

Марттагы жолугушуу, АКШнын афган өкмөтү менен “Талибан” кыймылы ортосунда тынчтык сүйлөшүүлөрдү өткөрүү аракеттеринин бир бөлүгү катары бааланууда.  АКШнын Афганистан маселеси боюнча атайын өкүлү Залмай Халилзад бүгүнкү күнгө чейин “Талибан кыймылынын өкүлдөрү менен Жакынкы Чыгыш өлкөлөрүндө үч ирет жолугушту.

Бирок ошого карабастан, талиптер афган өкмөтү менен түздөн-түз сүйлөшүүнү каалабастыгын билдиришкен.