Өзбекстан Кыргызстанда тогуз ишкана ачат
Өзбекстан Кыргызстанда автоунаа тейлөө, айыл чарба техникасын кураштыруу, пластик буюмдарды чыгаруу жана башка тармактар боюнча тогуз ишкана ачат. Бул тууралуу Кыргызстандын Инвестицияны илгерилетүү жана коргоо агенттигинин директорунун орун басары Шумкарбек Адилбек уулу билдирген.
Анын айтымында, жети компания “биргелешкен кыргыз-өзбек” деген макамга ээ болот. Өзбекстандын “ArtelEngineering” жана Кыргызстандын “Л.Т.Б” фирмалары “Artel” брендиндеги кир жуугуч апараттарды кураштырган ишкана ачса, өзбекстандык “PerfectPlast “ менен кыргызстандык “Имзо ЛТД” пластик жана алюминий профилдерин чыгаруучу цех курат.
Өзбекстандын “УзАвтоСаноаты” Кыргызстандын “АвтоОңдооЗаводу” менен биргеликте айыл чарба техникасын жасоо жана чиркеме техниканы кураштыруу боюнча эки ишкана түзөт. Өзбекстандын ушул эле компаниясы Кыргызстандын “ДТ Техник” компаниясы менен автобус кураштыруучу, “Автоцентр Эстакада” менен транспорт тейлөөчү завод ачат. “Автоцентр Эстакада” менен “Равон Моторс Тянь-Шань” компнаиялары болсо жеңил автунаа кураштыруучу завод жана дилердик борбор ачат.
Мындан тышкары, Ташкенттеги “ArtelEngineering” ишканасы Кыргызстанда өз филиалын ачат жана “Media Park” атуу көңүл ачуучу борбор курат.
Кабарда келгендей, булардын баары боюнча меморандумдарга кол коюлган. Ишканалардын айрымдары курулуп бүтүп калса, кээ бирлери жылдын аягына чейин бүтөт. Аталган ишканалар Бишкек, Ош жана Кара-Балта шаарларында ачылат.
