Иран парламенти нааразылык акцияларын жабык режимде талкуулады
Иран парламенти 7-январда атайын жыйынга чогулуп,өлкөдөгү нааразылык акцияларын жабык эшиктер артында талкуулады. Реформачылар фракциясы тарабынан чакырылган жабык жыйында башаламандыктардын себептери каралды.
ISNA маалымат агенттиги кабарлагандай, сессияга ички иштер министри, разведка башкармалыгынын жана коопсуздук кеңешинин башчылары катышкан.
Реформачы депутаттардын сугушу менен күн тартибине камакка алынгандарга укуктук жардам берүү маселеси да кошулду.
Бийлик беш күндөн бери өкмөттү колдогондордун митингин өткөрүүдө. Бийликти колдогон митингдер 7-январда мамлекеттик ЖМКлар аркылуу кеңири көрсөтүлдү.
Мамлекеттик ЖМКлар өкмөткө каршы нааразылык демонстрацияларын көрсөтүүнү токтоткон. Революция сакчылары корпусу режимге каршы демонстрациялар бүткөндүгүн билдиргенине карабастан, 6-январда Ирандын 9 шаарында, ошолордун арасында Тегеранда да демонстрациялар болгондугу кабарланууда.
Мындан тышкары, Такестан, Арак, Масжиди Сулайман, Мешхед, Казвин, Рашт, Лахижан жана Иран Ислам Республикасынын негиздөөчүсү, аятулла Рухолла Хомейнинин кичи мекени Хомейниде түнкү демонстрациялар болгону кабарланды.
Ирандагы нааразылык акцияларындагы кагылыштарда 22 адам өлүп, 1700дөн ашык адам кармалды.
