Столтенберг: Биз Россия менен кайрадан суук согушка кирүүнү каалабайбыз
НАТОнун башкы катчысы Йенс Столтенберг Россия менен жаңы суук согуш кайталанышынан эскертти. Бирок Столтенбергдин билдиришинче, НАТО Москва менен саясий диалог өткөрүүнү колдоп-кубаттайт.
Столтенберг “Deutsche Wirtschafts Nachrichte” гезитине интервью берип: “Эсибизден чыгарбашыбыз керек, биз Россия менен мамиле кылабыз. Аны менен суук согушка кирүүнү жана жарыша куралданууну кайталагыбыз келбейт. Тескерисинче, Москва менен – мейли бул нерсе жеңил болбосо да – саясий диалог алып барууну колдойбуз”, – деди.
НАТОнун башкы катчысы Россия менен НАТОнун ортосундагы алакаларды, айрыкча аскерий каналдар аркылуу орнотулуучу алакаларды өнүктүрүүдөн үмүттөнгөндүгүн билдирди. Себеби, анын билдиришинче, дүйнөдө кооп-коркунуч, душмандык күчөп барууда. Бирок, Столтенберг дүйнөгө коркунуч туудуруп жаткан жана душмандыгы күчөп жаткан күч ким экендигин ачыктабады.
Столтенберг НАТО өнүгүүнү улантып, күчүнө күч кошуп бара берерин кошумчалап, РФ армиясынын башкы штаб башчысы Валерий Герасимов менен акыркы жолугушууну “Россия менен НАТО мамилесиндеги алдыга жылуу” деп баалады.
НАТОнун башкы катчысы өткөн декабрь айынын соңунда НАТОго караштуу деңиз флоту деңизде согушуу жөндөмүн жоготкондугун моюнга алган жана ошону менен бир катарда деңиз флотунда жана суу астындагы ишмердүүлүктө Россия жогорку деңгээлге чыккандыгына ишара кылган эле.
Туркистон:
НАТО саясий блок эмес. Столтенберг саясий диалог тууралуу сөз кылып жатканда АКШ тарабынан боло турган диалогдорду назарда тутуп жатат.
НАТО АКШнын аскерий блогу экендиги бардыгына белгилүү. Ал “Варшава келишими” негизинде бириккен мамлекеттерге каршы, алардан Европа Союзу мамлекеттерин коргоо максатында түзүлгөн болсо, СССР жок болгондон кийин аталган уюм Европа Союзун АКШ ойлоп таап жаткан жасалма коркунучтардан коргой баштады. Алгач Европадагы Россиянын аскерий аралашуусун жок кылуу максатында Югославияны таратып жиберди. Бул аркылуу Европа мамлекеттери менен Россиянын ортосунда жарака пайда кылып, Европанын АКШга жана НАТОго муктаждыгын күчөтүүгө жетишти. Андан соң жасалма түрдө Иранды агрессор мамлекет кылып көрсөтө баштады. Ушулардын бардыгы НАТОнун регион үчүн канчалык маанилүү экендигин билдирип коюу жана ага жасалма муктаждык пайда кылуу үчүн болгон эле. Негизи, НАТО Россияга каршы Европа тараптан коюлган Американын аскерий блогу!
Бүгүнкү күнгө келип, Россия АКШга коркунуч туудура албай турган алсыз мамлекеттер катарынан орун ала баштады. АКШ кырдаалга ылайыкташып, Россияны мурункудай атаандаш эмес, НАТО сыяктуу аскерий кызматчы катары ишке салмакчы болууда. Ага каршы Европа Союзу тарабынан киргизилген экономикалык санкцияларды күчөтүп баруу менен Россия жана Европа Союзун бири-биринен алыстатып, бири-биринен коркутуу менен алардын АКШга муктаждыгын күчөтүп барууда.
Ошондуктан, НАТО Россияны кызматташтыкка чакыра баштады! Т.а. НАТО Россияны Сириядагы сыяктуу, Афганистандагы же дагы башка бирер региондогу аскерий операцияларга катышууга үндөмөкчү болууда. О.э. АКШнын Кытайга каршы долбоорлорунда кызматташууга мажбурламакчы болууда.
Путин шайлоонун алдында АКШнын ар кандай шартына ыраазы болуп жаткандай. Себеби, буга чейин Россия мынчалык саясий алсыз абалда шайлоо өткөргөн эмес. Россия бийлиги буга чейин өз жарандарынан мынчалык алыстап калбаган эле. Антпесе, жазда Ирандагы сыяктуу козголоңдор уюштурулат. Мындай козголоңдорго азыркыдай ыңгайлуу шарт буга чейин болгон эмес! Демек, мындан кийинки иштер кандай багытта кетишин Путин режими менен АКШнын аскерий жашыруун келишимдери чечиши мүмкүн!
