Санкт-Петербург метросундагы жардырууну жанкечти ишке ашырган эмес
Укук коргоо органдары Санкт-Петербург метросундагы жардыруу боюнча алгачкы корутундуну маалымдашты. Адистердин пикиринде, жардыруучу жабдык жанкечти тарабынан аракетке келтирилген эмес.
“Мындай жыйынтыкка окуя болгон жайда жанкечтинин денеси табылбаганы негиз болду. Билесизби, эгер адам өзүндө жардыруучу жабдыкты аракетке келтирсе, ал өзгөчө дене жараатын алат. Аларды алмаштырып жиберүү мүмкүн эмес”, – деди “РЕН ТВ”га корутундудан кабардар булак.
О.э. эксперттер бомба эмнеден жасалганы жөнүндө билдирүү беришти. Биринчи маалыматтарга ылайык, жарылуучу зат 300 грамм тротил эквиваленти кубатына ээ болуп, адамдын денесине жараат жеткирген майда металдар менен жабдылган. Жарылуу кубаты күчтүү болбогонун жардырууга кабылган вагон “шишүү таасири” деп аталган зыян көрбөгөнү да тастыктап турат.
“Эсиңердеби, бир канча жыл мурун Москва метросунда жүз берген теракт натыйжасында вагондор кандай абалга түшкөн эле? Бүгүнкү жардыруу – бир топко алсыз”, – деп түшүндүрүп өттү адис.
Алгачкы тыянактарга ылайык, кылмышкерлер бомбаны метро вагонунда калтырып кетишкен. Жарылуу таймер жардамында ишке ашырылган болушу мүмкүн.
Атайын кызматтын божомолунда, кылмыш артында бытыранды, өз ара байланышы жок “автономдуу оңчул активисттер” деп аталган неонацист топтор турган болушу мүмкүн.
“Кайсы бир жерде бирер нерсени жардырышат, кайсы бир жерде кимдир бирөөнү өлтүрүшөт. Алгач алар көпчүлүк эле, бирок кийинчерээк абдан көбү темир торго ташталды. Азыр муун алмашты, жаңылары пайда болду”,- деди РЕН ТВ маектеши.
Туркистон:
3-апрель күнү ишке ашырылган Петербург шаардык метросундагы жардыруу артынан жүздөгөн Орто Азия мигранттары кысымга алынууда. Россиянын бардык расмий маалымат каражаттары өзүн жардырды деп айыпталып жаткан тарап Россия жараны Акбаржон Жалилов экенин кабарлады. Ал жигит Кыргызстанда туулуп, кийин Россияга көчүп кеткенин айтып, Кыргыз бийлиги да кабатырлануу билдирди. Негизи, маркум Жалиловдун денеси ал өзүндө жарылуучу затты жардырбаганын көрсөтүп турат. Жанкечтинин денеси бир нече бөлүктөргө бөлүнүп кетиши керек эле. Муну Кыргызстанда Кытай элчилигинин жанында өзүн-өзү жардырган жанкечтинин бир колу 50 метр аралыкта жатканын расмий телеканалдардан көргөнбүз.
Россия коопсуздук кызматы – экспертизанын жыйынтыгы чыкпай жатып – А. Жалиловду айыптуу деп жарыялап, аны менен алакада болгон бардык адамдарды зөөкүрлүк менен камакка ала баштады. Этибар берсеңер, анын кол телефону жарылып кеткенине карабастан, аны менен телефон аркылуу байланышта болгон адамдар камалууда. Демек, бул жигит мурунтадан эле атайын кызматтын көзөмөлү астында болгон.
Жогорудагы экспертиза жыйынтыктары этибарга алынса, орус расмийлери Кыргызстандан жана Жалиловдордун үй-бүлөсүнөн кечирим сурашы жана өлтүрүлгөн Акбаржон үчүн кун төлөшү керек. Албетте, орус тарап Кыргызстан мамлекетин жана жарандарын урматтаса!!!
