Рима Халаф: БУУ Израилдин кылмышына көз жумуп келүүдө
БУУга караштуу Батыш Азия экономикалык жана социалдык комиссиясынын аткаруучу катчысы Рима Халаф отставкага кетти. Анын отставкасына аталган комиссия тарабынан далилдер негизинде сунушталган Израилдин апартеиддик режими туурасындагы отчёт себеп болду.
Комиссиянын аткаруучу катчысы Рима Халаф БУУнун башкы катчысы Гутерреш жана АКШнын БУУдагы туруктуу өкүлү Никки Хейли Израилди айыптаган отчётту кайтарып алууну талап кылгандыгы себептүү отставкага кеткендигин билдирди. Бул тууралуу анын өзү Ливандын борбору Бейрутта журналисттер үчүн уюштурулган маалымат жыйынында билдирди.
Түпкү келип чыгышы палестиналык болгон Иорданиянын жараны Рима Халаф: “Мына ушул отчёт себептүү мага өткөрүлүп жаткан басымдарды кабыл ала турган даражада эмесмин. Менин милдетим ачык көрүнүп турган кылмышты жашыруу экендигин билгеним үчүн отставкага кетип жатам”, – деди.
Халафтын айтымында, ага Израиль караланган отчётту кайтарып алуу туурасында буйрук эки ай мурда берилген. БУУнун башкы катчысы Гутерреш менен АКШнын БУУдагы туруктуу өкүлү Никки Хейли отчётту тез арада кайтарып алууну катуу талап кылышкан.
Израилди ачык-айкын көрүнүштө апартеиддик мамлекет катары айыптаган отчёт БУУнун тарыхында биринчи жолу жүз берип жатат. Рима Халаф илимий изилдөөлөр жардамында даярдалган отчётто Израилдин Палестина калкын тынымсыз кемсинтүүлөрү фактылар менен далилденгендигин билдирди.
Башкы штабы Бейрутта жайгашкан БУУнун Батыш Азия экономикалык жана социалдык комиссиясынын курамына 17 араб мамлекети, ошону менен бир катарда Мисир, Ливан, Иордания, Ирак жана Булуң кызматташтык кеңеши мамлекеттери кирет.
Комментарий: БУУ жана ушул сыяктуу бардык уюмдар колонизатор мамлекеттердин – бүгүнкү күндө АКШнын – саясатына мыйзамдуу түс берип, аны ишке ашырып бере турган уюмдар болуп эсептелишет. Ошондуктан, БУУнун иш жүргүзүү саясаты дүйнөлүк саясатка таасир өткөрүп жаткан мамлекет белгилеген принциптерден башкача болушу мүмкүн эмес. БУУнун алкагында жүргүзүлгөн иликтөөлөр канчалык “бейтарап, көз карандысыз” деп айтылбасын, түпкүлүгүндө колонизатор мамлекеттердин кызыкчылыгына кызмат кылат.
