Кыргызстандын негизги соода өнөктөшү – Швейцария
“Кыргызстандын негизги экспорттук товары алтын, Швейцария болсо, анын негизги кардары болуп калууда. Кыргызстандын жалпы экспортунун 42%ы ушул мамлекетке туура келет”, – деп айтылат Кыргызстандын экономика министрлигинин сайтында.
Министрликтин маалыматына таянсак, Кыргызстан жалпысынан 80 мамлекетке товар экспорт кылат.
Кыргызстандын бул мамлекеттерге экспортунун көлөмү жалпы экспорттун 92 пайызын түзөт. Алтынды эсепке албаганда, Кыргызстандын негизги соода өнөктөштөрү ЕАЭБге мүчө мамлекеттер. Т.а.ЕАЭБге экспорттун көлөмү болжол менен 50%ды түзөт.
Кыргызстан экспортундагы негизги үлүш баалуу металдарга, ошонун катарында алтынга тиешелүү болуп, жалпы экспорттун 45,4%ына барабар. Экспорттун жалпы көлөмүндөгү айыл чарба продукцияларынын үлүшү 12%пайыздан көбүрөөк, жеңил жана текстиль өнөржайынын продукциясы 11%га , ал эми машина куруучулук продукциялары 11,2%га барабар.
Өткөн жылы алтын экспортунун көлөмү 5,4% көбөйгөн болсо, руда жана баалуу металдардын концентраттары 7,7%га, мөмө-жемиштер 36,1%га, көмүр 29,2%, айнек жана андан болгон товарлардын экспорту 27,4% пайызга көбөйгөн.
Экономика министрлигинин билдиришинче, Кыргызстан экспортунун сырьёго багытталгандыгы жана өндүрүштүн артта калгандыгы өнүгүүдөгү эң негизги проблема болуп эсептелет.
