Трамп Исламга каршы күрөштү күчөтүү ниетинде
АКШ президенти Дональд Трамп Флорида штатында жайгашкан МакДилл авиа-базасында сөз сүйлөп, Исламга каршы күрөштү күчөтүү ниетинде экендигин билдирди. Ал террорго каршы күрөш тууралуу сөз сүйлөп, “террор” сөзүнө “Ислам” сөзүн кошуп “Исламий терроризм” деген сөздү колдонду.
“Бүгүн биз биримдикте (союздаштарыбыз менен биргеликте) экендигибиз тууралуу канкор жана бузуку күчкө (Исламга) сигнал жиберип жатабыз. АКШ жана анын союздаштары албетте алардын үстүнөн жеңишке жетишет. Радикалдык исламий терроризмди жеңебиз. Биз мамлекетибизде алардын тамыр жайышына жол бербейбиз”, – деди Трамп терроризмге каршы күрөш тууралуу сүйлөгөн сөзүндө.
Ал: “Террорчулар массалык кыргын кылууга киришишет жана бүт дүйнөдө ыпылас иштерди кылышат”. “Алар11-сентябрь, Бостондогу чабуул о.э. Европада уюштурган террордук аракеттери сыяктуу мамлекетибизге чабуул кылуу ниетинде”, – деп кошумчалады.
Трамп Европада террористтик чабуулдар үзгүлтүксүз болуп жаткандыгына ишара кылды. О.э. АКШ армиясына кайрылып: “Силердин артыңарда биз турабыз. Аскерий мүмкүнчүлүгүңөрдү күчөтөбүз. Силер биздин баатырларыбызсыңар”, – деп айтып, армияны жаңы аскерий техникалык жабдуулар менен камсыздай тургандыгын баса белгиледи.
Трамптын билдиришинче, МакДилл базасы АКШ Куралдуу күчтөрүнүн борбордук командачылыгынын штабын өз ичине алат жана айрыкча Жакынкы Чыгыш жана Түндүк Африкадагы аскерий операциялар боюнча жоопкер.
АКШ бийлиги НАТОну колдоп-кубаттай тургандыгы тууралуу билдирди. Ак үйдүн жарыя кылышынча, Трамп телефон аркылуу НАТОнун баш катчысы Йенс Столтенберг менен сүйлөшүп, Вашингтон НАТОну колдоп-кубаттай тургандыгын билдирген. Бирок, ал НАТОнун бардык мүчөлөрү мойнундагы каржылык милдеттерди толук жана татыктуу көрүнүштө аткарышын талап кылган.
Ак үйдөн берилген билдирүүдө: “Президент Трамп НАТОнун баш катчысына АКШ НАТОну колдоп-кубатташын билдирди. Эки жетекчи НАТОнун бардык мүчөлөрүнүн каржылык милдеттенмелерди аткаруу мүмкүнчүлүгүн талкуулашты”. “Тараптар кызматташтыкта аракет кылууга жана НАТОнун алдында турган бардык проблемаларды алып таштоо үчүн биргеликте иш жүргүзүүгө келишип алдышты”, – деп айтылат.
Маалымат үчүн айта кетсек, Трамп буга чейин, айрыкча шайлоо кампаниясы учурунда НАТО эскирип калгандыгы тууралуу бир нече жолу кайталаган.
