Яхя Машрапов: Стамбулдагы терактка эч кандай тиешем жок
Стамбулдагы терактты ишке ашыргандыкта шектелген Кыргызстан жараны Яхя Машрапов бул терактка тиешеси жоктугун билдирди.
Түркия маалымат каражаттары 3-январда 28 жаштагы кыргызстандык Яхя Машраповдун паспортунун сүрөтүн терактка шектүү катары жарыялап жиберишкен.
АКИpress агенттигинин маалыматына таянсак, Машрапов 3-январда Түркиядан Бишкекке учуп келген жана аны Кыргызстандын УКМК кызматкерлери суракка алышкан.
Машраповдун айтымында, ал 1-январь күнү Бишкектен Стамбулга соода иштери менен учуп барган. Ал эми кайтып жатканда түрк полициясы суракка алган.
“Мен Кыргызстанга учуп атканда түрк полициясы мени бир саат суракка алган. Паспортумду текшерип сүрөткө тартышкан. Менин жаңы жылдагы терактка тиешем жоктугу аныкталган. Ошондон кийин мени кое беришкен”, – деди Машрапов.
Ал 31-декабрда Кыргызстанда болгондугун далилдей ала тургандыгын кошумчалаган.
