Калкты тукуруудан кимге пайда
Маалым болгондой, Жалалабад облусунун Алабука районунда 13-октябрь күнү каза болгон Каныгүл Сатыбалдиеванын жерге берилиши бир канча талаш-тартышууларды жаратты. Буга негизги себеп Каныгүл Сатыбалдиеванын Ислам дининен чыгып, христиан дининин баптист агымына өтүп кеткендиги болгон. Жергиликтүү мусулмандар өз дининен чыккан аял сөөгүн мусулмандар көрүстөнүнө коюлушуна каршылык билдиргени себептүү анын сөөгү мусулмандар көрүстөнүнөн кайта казып алынып христиандар көрүстөнүнө коюлган эле. Бирок, христиандар каршылыгы артынан сөөк экинчи жолу казып алынган жана Алабука айылындагы көрүстөнгө көмүлгөн, бирок кайрадан жергиликтүү элдин каршылыгы себептүү үчүнчү жолу кайта казып алынып, жашыруун түрдө көмүлгөнү туурасында ММКлар кабар таркаткан.
24-октябрь күнү “АКИpress” маалымат агенттигинде болуп өткөн пресс-конференцияда Квалификациялуу укуктук жардам көрсөтүү борборунун директору Жанар Аскар кызынын маалымдашынча, Алабука району Ички иштер бөлүмүнүн 10-бөлүм кызматкерлери жергиликтүү элди Каныгүл Сатыбалдиеванын өлүгүн кайта казып алышка тукурган.
“Анын иниси бизге укуктук жардам сурап кайрылган. Инисинин маалымдашынча, ИИМ 10-бөлүм кызматкерлери алардын үйүнө жергиликтүү өкмөт өкүлдөрүн жана имам менен келип, маркумдун жакындары өз ишенимдеринен баш тартышса өлүктү жергиликтүү көрүстөнгө көмүүлөрү мүмкүндүгүн айтышкан. Жакындары ыраазы болушкандан кийин имам жаназа намазын окуган жана өлүк көмүлгөн”,- деди Жанар Аскар кызы.
Адвокаттын айтышынча, сөөк христиандар көрүстөнүнө коюлгандан кийин 10-бөлүм кызматкерлери жергиликтүү элди тукурган, натыйжада жакындарын өлүктү башка көрүстөнгө көмүүгө мажбур кылышкан.
“Алар сөөктү Өрүктү айылына кайта көмүү үчүн кабырды ачууга туура келген. Өлүктү көмүп жатышканында жергиликтүү элден эч ким каршы болбогон. Бирок өлүк көмүлгөндөн кийин 10-бөлүм кызматкерлери кайрадан элди буга каршы козгогон. Натыйжада Өрүктү айылынын эли өлүктүн көмүлүшүнө каршы чыгышкан жана жергиликтүү имамды алып келип өлүктү кайта казып алыш жана алып кетишине мажбур кылышкан. Бул убакыт аралыгында 10-бөлүм кызматкерлери маркумдун жакындары ишенимдерин маскаралап турушкан. Жакындары милициянын басымы астында өлүктү Алабука айылына алып барып көмүшкөн. Арадан эки күн өтүп кайрадан ошол 10-бөлүмдүн кызматкерлери чалып, Алабука айлынын элин өлүктүн көмүлүшүнө каршылык кылып жатышкандыгын айтышкан. Бирок жакындары үчүнчү жолу өлүктү кайта казып алыштан баш тартышкан. Ошондон кийин 10-бөлүм кызматкерлери өздөрү казып алып белгисиз тарапка алып кетишкен. Биз азырга чеин өлүктүн кай жерде экендигин билбейбиз”,- деди укук коргоочу.
Пресс-конференция катышуучулары Баш прокурор, жогорку кеңеш жана президентке кайрылуу жолдоп, 10-бөлүм кызматкерлерин кылмыш жоопкерчилигене тартышын сурашты.
“Алар өздөрүн 10-бөлүм кызматкерлери деп тааныштырышты, бирок документтерин кароого мүмкүнчүлүк беришпеди. Алардын бул аракеттери кылмыш-жаза кодекстеринин 263, 299 жана 316-беренелерине түшөт”,- деди Жанар Аскар кызы.
