ИИМ 10-бөлүм башчысы курал сатканы үчүн колго түшүрүлдү
Аскер бөлүктөн көп сандагы курал-жарак сатууга байланыштуу аскер кызматкерлери менен бирге ИИМдин 10-башкармалыгынын бөлүм башчысы кармалды. Бул тууралуу Ички иштер министринин орун басары Данияр Абдыкаров билдирди.
Анын ырасташынча, бул кылмыш боюнча Чек ара кызматынын кызматкерлери, эс алуудагы ардагери жана милиция кызматкери кармалды. Алар учурда камакта. Ишти Аскер прокуратурасы тергеп жатат.
Башкы Штаб бул боюнча иликтөө жүрүп жатканын маалымдап, Мамлекеттик чек ара кызматынын төрага басары баш болгон 14 офицер кызматтан алынганын билдирген.
Туркистон:
Кыргызстан мамлекети ишенбөөчүлүк көрсөтүү керек болгон мамлекетке айланып барууда. Өткөн жылы президенттин апарат башчысы менен бир депутат камакка алынышты. Алар түрмөдө отурган Бишкектин мурдагы мэринин кызынан 100 миӊ доллар пара алып жатып кармалышкан болчу. Мындан бир аз мурда, Кыргызстандын парламентин бир нече жыл башкарып келген “Жогорку Кеңештин” спикери камакка алынды. Ал да, мамлекеттик мүлктү өз кызыкчылыгы жолунда иштеткендикте айыпталган. Акаев да, Бакиев да жана алардын айланасындагылар да, миллиарддаган акчаларыбызды алып чыгып кетишти. Алар ошол бизден уурдап алып кетишкен акчалары менен дагы кайрадан бийликти ээлеп жатышат. Бакиевчилер кайра эле министр, депутат, губернатор болуп бийликте жүрүшөт.
Милиция кызматкерлери акыркы кездерде өтө көптөгөн кылмыштарды кылып жатышат. Алар Ошто ал тургай бандит жана рекеттер менен аралашып, милиция кызматкерлери болгон бандиттик группаларга айланып бара жатышат. Спорттук клубдар да жогорку кызматтагы орган кызматкерлеринин демөөрчүлүгү астында иш алып барышат. Алар кылып жаткан кылмыштардын дээрлик бирөө да ачылган эмес. Мисалы, соодагерлердин миллиондогон акчалары уурдалып, тонолду. Бири да табылган жок. Себеби, бул сыяктуу ыпылас иштерди ушул сыяктуу ыпылас орган кызматкерлери кылышат. Түпкүлүгүндө, алар спорт менен машыккан бандит жигиттер болуп, аларга орган күбөлүгү элди тоноп жатканда расмийчилик үчүн жана коргонуу үчүн гана керек. Булардын демөөрчүлөрү болсо, министрликке карай көтөрөлүп бара беришет. Себеби, өкмөткө айырмасы жок, шайлоодо же тартипти сактап турууда элди басым астында кармап туруучу күч болсо болду. Алар элге зулум кылуу менен тартипти сакташабы, мыйзамга моюн сунушабы же жокпу, айырмасы жок. Маанилүүсү, шайлоодо добуш алып беришсе жана элдин үнүн чыгарбай турушса болду.
Буга чеин, июль айында Жалалабад облусу боюнча 10-бөлүмдүн мигранттар боюнча бөлүм башчысы майор Бекжан Ажыкулов, Кытай жараны болгон уйгур соодагерди уурдап кеткендикте айыпка тартылган эле. Эми Бишкек ИИМдин 10-бөлүм башчысы, бир катар аскердик кызматчылар менен бирге курал сатып жаткан убагында колго алынды. Октябрь айынын башында, мурунку (коргоо министри) азыркы учурда коргоо иштери боюнча комитет раиси Кенжесариевдин айдоочусу 3 даана автомат сатып жаткан жеринен колго алынды.
ИИМдин басма-сөз бөлүмү 21-октябрда таркаткан маалыматка караганда, жыл башынан сентябрь айына чеин, жарандар тарабынан орган кызматчылары үстүнөн 1840 арыз келип түшкөн. 55 орган кызматкери иштен айдалып 71 кызматкер иштен бошотулган. Мындан тышкары 1318 орган кызматчысы жазага тартылып, 693 материал тергөөгө жөнөтүлгөн. Булардын ичинен 81 кылмыш иши козголгон. Ушуга карабай өкмөт өзүн жана жарандар коопсуздугун жана алардын үстүнө кылмыш иштерине каршы күрөшүү милдетин ушул кылмышкерлерге толгон орган кызматкерлерине тапшырып койду. Жогорудагы арыздар жүздөгөн мазлум жарандын бирөөсү тарабынан эле жазылган. Демек бул зулумдар кеминде жүзгө көбөйтүлөт. Орган үстүнөн жүрүп жаткан иштер болсо бир канча кем кылып көрсөтүлөт же бүтүндөй жашырылып жиберилет. Мейли айтылып жаткан көлөмдөгү арыздар же кылмыш иштердин жарымы жада калса үчтөн бири исламий адамдар тарабынан кылынганда барбы.
Бийлик т.а министрлер бул иштерге көз жумуп гана койбостон, балким кылмышкерлерге колдоочу жана алар менен шериктик кылышат. Анткени бул кызматкерлердин ыплас иштеринен түшкөн кирешелер менен бөлүшөт.
Бузук күчтөр бир мусулмандын бирер туура эмес аракети үчүн бүт мусулмандарды айыптоого аракет кылышат. Орган кызматкерлеринин, министр, депутат же президенттердин кылмыштары үчүн болсо, ошол адамдын өзүн гана айыптуу кылып, калгандары уялбастан ыпылас иштерин уланта беришет. Акыры бир кылмышты мусулман кылса да, кафир же мунафык кылса да натыйжасы өзгөрбөйт го. Т.а. бирер адамды өлтүрсө, аны ким өлтүргөнү маанилүү эмес. “Эмне үчүн өлтүрдү, өлтүргөнгө укугу бар беле, чектен чыктыбы” маселенин ушул тарабы маанилүү. Аны бирер сакалдуу мусулман өлтүрсө, бул коомго коркунуч туудурат экен да, милиция кызматкери өлтүрсө эч кандай коркунуч жок имиш. Акыры бул орган кызматкерлерин биз өзүбүз үчүн коргоочу кылып жалдаганбыз го. Алар ишенимсиз болушса, эмне үчүн биз аларга ишене беришибиз керек. Мусулмандарды болсо, шектүү адамдар деп кылмыш жоопкерчилигине тартып жатышат. Алардын кылмыштарына шерик деген шылтоо менен досторун жана жакындарын да тергөөгө алып жатышат. Бул кандай эки стандарттуу саясат. Эл аралык уюмдар, сот жана укук коргоочулар сокур болуп калышканбы?
