Баннердин маанисин бурмалоо аракети
Кыргызстан бийлиги телеберүүлөр аркылуу никаб жана паранжыга каршы баннердин маанисин бурмалоого аракет кылды
Туркистон:
Акыркы күндөрдө Бишкекте илинген баннерлер президенттин буйругу менен жалпы республикага жайылтыла баштады.
КТРдин 19-июлдагы “Ой ордо” телеберүүсүнө Чубак ажы Жалилов, Жамал Фронтбек кызы жана “Ыйман” фондунун төрагасы Нуржигит Кадырбековдор катышты. Алар бийликтин буйругу менен менен мусулмандардын хижабын улуттук кийимге ылайыкташтыруу жана баннердин максаты ушуга каратылгандыгы жөнүндө талкуулашты. Т.а. “баннердин максаты кыргыздын элечеги арабдардын улуттук кийимине алмашып бара жатканына каршылык көрсөтүү жана аларды улуттук кийимге кайтарууга үгүттөө” деген маанидеги сөздөрдү айтышты.
Түпкүлүгүндө, андай эместиги ачык-айкын көрүнүп турат. Калыстык үчүн айта кетүүчү нерсе, элечек шарияттын талабына жооп берет. Бирок, калган хижабдар да шаръий кийимдер болуп эсептелип, алар да хижабдын (авратты жабуучу кийим) талабына туура келет.
Бийлик улутчулдукту күчөтүп жатат. Улутчулдар исламий идеологиялык каршылыкка дуушар болушту. Исламда улутчулдук арам амал жана сасык түшүнүк болуп эсептелет. Муну билген Батыш идеологдору бул улутчулдарга исламдашуу аркылуу Исламий мухитти улутчулдукка буруу милдетин жүктөдү. Алар улуттук туйгуларыбыздан пайдаланып, имамдарыбызга жана аалымдарыбызга улуттук кийим кийгизишти. Андан соӊ башка улуттагы аалым жана имамдарды коомдон четтетүү иштери башталды. Кезек аялдарыбызга жетип келди. Бирок, бардык аялдарды эмес, исламий кийимде жүргөн аялдарды гана улуттук кийимге чакыруу, мажбурлоо жана куугунтуктоо башталууда.
Бузуку улутчул аракет, бийлик жана орган кызматкерлери биригип, араб хижабын кийүүнү каалаган аялдарды жана алардын жакындарын куугунтуктоого аракет кылып жатышат. Ошол телеберүүдө Фронтбек кызы Жамал 10-бөлүмдүн кызматкерлери менен биргеликте Оштогу өзбек маалелерде “улуттук кийимиӊерди кийгиле, кара түстөгү кийимдерди же башка улуттардын кийимин кийбегиле” деп түшүндүрүү иштерин жүргүзгөнүн айтып өттү. Орган кызматкерлеринин биздин кийимибиз менен эмне иши бар!? Демек, Жамал бийлик менен биргеликте кара хижабга каршы аракет баштаган. Орган кызматкерлери болсо өкмөттүн буйругу менен Жамалга жардам беришкен. Мындан башкача болушу мүмкүн эмес.
Бул улуттук аракеттердин эки тарабы бар. 1) Улуттук туйгуларыбызга эрк берип, шаръий акы-укуктарга каршы чыгып, башка улуттун өкүлдөрүнө же башка улуттун шариятка туура келген кийимдерине каршы чыгуу менен чектен чыгуу. Т.а. улутчулдардын улуттук баалуулуктарды исламий баалуулуктардан жогору коюуга умтулуусу, Аллах сактасын. Теңирчилердин пайда болушу жана көбөйүп жатышы да ушул улуттук аракет жетекчилеринин демилгеси менен жана аларга шарттарды түзүп бериши менен ишке ашты. Бийлик аларды коргоп келе жатат. (Бул улутчулдуктун терс көрүнүшү болуп эсептелет)
2) Чубак ажы “баннерди элечекти чечип койгондорго, жарым жылаӊач кыздарга о.э. коомдук жайларда ачык эле жыныстык алакада болуп жаткан кыргыз кыздарга каршы пайдаланышыбыз керек” деди. Т.а. элечекти хижаб деп билебиз. Хижабды шаръий кийим деп билебиз. Демек, андан башка улуттардын шарият талабына жооп берген кийимине эмес, шариятта арам болгон кийимдерге каршы күрөшүүбүз важиб. Эгерде баннердеги сүрөттөрдү элечекке үгүттөө деп эсептесек, анда аны улуттук кийим деп белгилешин, жок эле дегенде мамлекеттик мекемелердеги кызматкерлердин милдетүү кийими катары мыйзамдуу түс беришин өкмөттөн талап кылышыбыз керек болот. Мындай практика Малайзия, Индонезия, Саудияда бар. (Бул нерсе улутчулдуктун оӊ көрүнүшү болуп эсептелет)
Улутчулдар исламдашкан болсо, өздөрүнүн жана бүт кыргыз калкынын улуттук туйгуларын исламдаштырууга аракет кылышсын. Себеби, Ислам дини улуттук үрп-адат, каада-салттарды жок кылганы келген эмес. Ислам улуттук үрп-адаттарыбызды тазалоо үчүн келген акыйкат дин. Т.а. алардын шариятка туура келгендерин сактап калууга шарт түзүп берүү үчүн, ал эми шариятка тескери келгендерин болсо жок кылуу үчүн келген.
Даъват да мына ушул түшүнүккө негизделиши керек. Биз даъватчылар улуттук үрп-адаттарыбызды исламдаштыруу максатында аракет кылышыбыз важиб. Бул биздин мойнубуздагы шаръий милдетибиз. Мындан башкача аракет кылышыбыз арам.
Кыргызстанда жашап, даъват ишин алып барып жаткан бардык даъватчыларга айтарыбыз, коомубузда бирер үрп-адатты же баалуулуктарды коргоп жатканда, улуттук же башка баалуулуктар диний баалуулуктардан үстөм болуп, анын алдына өтүп кетпеши керек. Т.а. жогорудагы аялдардын улуттук кийимдерин коргоп жатканыбызда, башка шаръий кийимдерди жамандоо арам. Себеби, биз чабул кылып жаткан бул кийимдерди Пайгамбарыбыз (с.а.в.)дын кыздары, аялдары жана башка сахабалар (р.а.)дын аялдары да кийгендигин унутпашыбыз керек. Бул арам иштерди ким кылып жаткан болсо да, аларды кайтарууга, жок эле дегенде алар тарапта турбастыкка буюрулганбыз.
Бирок, биз улуттук кийимге кайтуу менен жарым жылаңач жүргөн кыз-келиндерди да кийиндире алсак, анда бул чакырык важиб болуп калат. Эгерде бизди ушул шариятка туура келген улуттук кийимибиз бастырып келе жаткан Батыш дүйнө карашынан куткара алса, анда аны кийишибиз жана ага үгүттөөнү күчөтүшүбүз важиб болот. Себеби, ханафий мазхабынын шаръий коидасы боюнча “важиб эмне менен ишке ашса, ошол иш да важиб” деп айтылат.
Эми иш мамлекет жана президентте калды. Эми биргеликте элечекти канчалык коргоп, ага канчалык үгүттөй алабыз. Аны улуттук баалуулугубуздун негизи деп эсептеп, бийликтегилер буйругу же дагы башка мүмкүнчүлүктөрү менен, биз даъватчылар акыйкатка чакыруу иштерин активдештирүү менен, башкалар болсо жакындарыбызга ошол шаръий кийимдерди кийгизүү менен улутка жана исламга берилгендигибизди далилдеп коёлу.
Эгерде андай кылбасак т.а. баннерлерди илүү менен чектелип, элечек дагы кайрадан эсибизден чыгып кетсе, анда биз, болгону популист саясатчыбыз жана жасалма улуттук баатырбыз. Андай болбойт деген үмүттөбүз!
