Назарбаев Алматыдагы атышууларды теракт деп атады
18-июль күнү Казакстандын Алматы шаарындагы Алмалы райондук Ички иштер бөлүмүнө жана Улуттук коопсуздук департаментине куралдуу чабуул болгону себептүү мамлекетте террорчулуктун эӊ жогорку “кызыл” деңгээли жарыяланды. Шаарда кечке чейин антитеррор операциясы өткөрүлүп, ок атышууга тиешеси бар делген эки адам кармалды. Ошондон кийин Алматы шаарында өткөрүлгөн антитеррор операциясы аяктаганы тууралуу кабарланды.
“Учурда шаарда абал туруктуу. Кырдаал укук коргоо органдарынын көзөмөлүндө. Шаардын түрдүү райондорунда атышуулар болуп жатат деген кабарлар негизсиз”, – деп айтылат ИИМдин кабарында.
Казакстан коопсуздук комитетинин расмий билдирүүсүндө: “Террорчуларга каршы өткөрүлгөн операция аяктаганы себептүү Алматыдагы террордук коркунучтун “кызыл” деӊгээли “сарыга” өзгөртүлдү”, – деп айтылат.
Казакстан президенти Нурсултан Назарбаев коопсуздук кеңешинин шашылыш өткөрүлгөн жыйынында Алматыда жүз берген атышууларды теракт деп атап, өлгөндөр менен жараат алгандардын жакындарына көӊүл айтты. Президент бул окуя боюнча иликтөө иштерин тез арада аягына чыгарууну жана шаардагы адамдар көп чогулган жайларда коопсуздукту камсыздоону буйруду.
Акыркы маалыматтарга ылайык, атышууда 7 адам өлүп, 8 адам жарадар болгон.
