Кыргызстандын соода-өнөр жай палатасы кабар беришинче, Кыргызстан жана Түркия өндүрүштүк аймак куруу жөнүндөгү меморандумга кол коюшту.
Палатанын маалыматтарына ылайык, 21-22-январда Түркиянын борбору Анкарада эл аралык кыргыз-түрк ишкерлеринин бизнес форуму өттү. Иш-чара Түркиянын соода-өнөр жай палатасы жана биржалар биримдиги, КР Түркиядагы элчилиги, КР соода-өнөр жай палатасы, “Кыргызстан достук жана маданият” коому тарабынан уюштурулду.
Ага КР экономика министри Арзыбек Кожошев,Түркия Республикасынын Бажы жана соода министри Бүлент Түфенкжи, КР жана Түркиянын бир катар мамлекеттик кызматкерлери, жеке ишкерлер жана бизнесмендер катышты.
Кыргызстандын экономика министри Арзыбек Кожошев Кыргызстанда инвесторлор үчүн ыңгайлуу шарттар түзүлгөнүн жанан өкмөт түркиялык ишкерлер үчүн салыкты төмөндөтүүгө даяр экендигин айтып өттү.
Буга жооп иретинде Бүлент Түфенкжи Түркия тарап соода-экономикалык алакаларды өнүктүрүүгө кызыкдар экендигин жана Кыргызстан бизнес кылууну жөнөкөйлөштүрсө, анда Түркия Кыргызстанга ар дайым жардам берүүгө даяр экендигин баса белгиледи.
Форумдун алкагында Кыргызстандын экономика министрлиги жана Түркиянын Бажы жана соода министрлиги тарабынан соода-экономикалык мамилелерди күчөтүү боюнча үч келишимге о.э. өндүрүш аймагын куруу боюнча меморандумга кол коюлду. Март-апрель айларында Түркиядан Кыргызстанга чоң делегация келет жана мамлекеттеги базарды үйрөнүп, курулуш сметасын даярдайт.
