Тажикстан республикасынын Согди областына караштуу Кайраккум шаарында 1-апрель күнү Шанхай кызматташтык уюму (ШКУ)га мүчө мамлекеттердин Коргоо министрлеринин кезектеги үч күндүк жыйыны өз ишин баштады. Жогорудагы жыйында Өзбекстандан тышкары, бардык мүчө мамлекеттердин Коргоо министрлери катышууда.
Жолугушууда Россия, Кытай, Казакстан жана Кыргызстан делегацияларына Коргоо министрлери Сергей Шойгу, Чан Ваньцюан, Адилбек Жаксыбеков жана Таалайбек Омуралиевдер башчылык кылышат. Өзбекстандан барган делегацияга болсо Өзбекстан Куралдуу күчтөрүнүн бириккен штабынын башчысы, Коргоо министринин биринчи орунбасары Баходир Ташматов башчылык кылууда.
Тажикстан Коргоо министри Шерали Мирза төрагалыгында өтүп жаткан жыйында, ШКУга мүчө мамлекеттердин коргоо министрликтери ортосундагы кызматташтык жана аскерий-техникалык жардам көрсөтүү тармактарындагы маселелер талкуу кылынат.
Жыйындын катышуучулары негизги этибарды, терроризмге каршы күрөш жана наркотиктер жайылышына байланыштуу маселелерге каратышат. Мындан тышкары, Коргоо министрлеринин 2014-жылы Кытайда болуп өтүүчү терроризмге каршы күрөш боюнча аскерий окуу-машыгуулары маселелерин да талкуу кылышы күтүлүүдө.
