Париж, Лондон жана Берлинде мусулмандардын көбөйгөнү өзгөчө бир өзгөрүштөргө себеп болгондугу жашыруун эмес. Бүгүнкү күнгө келип, Москвада да мусулмандар саны тездик менен көбөйүп бара жатканы күзөтүлүүдө. Бул жараян мусулмандарды бир жерге чогулта турган исламий майрамдарда даана көрүнөт. Кечээ өткөн Курман Айт майрамында намазга он миӊдеген адамдар чыгышты, мечиттерде орун жетпегени себептүү адамдар көчөдө асфалтка жайнамаз салып, айт намазын окушту. Өткөн жылы жамгыр жана кар астында намаз окулган эле.
Шаар боюнча болгону төрт гана мечит бар. Мусулмандардын саны канчалык көбөйсө да, мамлекеттин жаӊы мечит куруу ниети жок. Москва мери Сергей Собянин: “Бир да жаӊы мечит курулбайт”, – деп жар салууда. О.э.: “Намаз окугандардын дээрлик бардыгы келгиндер жана алар баары бир мекенине кетишет”, – деп айтты. Жакында интервью берген Собянин: “Москва калкынын болгону 10 пайызы гана мусулмандар жана алар үчүн мечит курууга муктаждык жок”, – деп билдирди.
Божомолдор боюнча, Москвада эки миллион мусулман бар. Мусулмандардын саны боюнча бул шаар Европада биринчи орунда турат. Адистердин пикиринче, Россия борборунда диний жана демографиялык көрүнүш күн сайын жаӊыланып барууда.
Бирок, коомчулуктун арасында бул көрүнүшкө каршылар да жок эмес. Украинадан Москвага келип жашап жаткан Изольда Кукушкина өзүнүн славянка экендигин айтат. Ал чиркөөгө бара жатып, көчө толгон мусулмандарды көрүп: “Москванын келечеги кантип эле ушундай болсун”, – деп тынчсызданат.
