Россия коргонууга кеткен чыгымдарын азайтат
“РИА Новости”нин кабарына таянсак, Россия президенти Владимир Путин 2018-жылы коргонууга кетүүчү чыгымдар азайтылышын билдирген. Бирок анын айтымында, бул нерсе армия жана флотту кайрадан жабдуу боюнча пландарга таасирин тийгизбейт.
Путин Мамлекеттик Думадагы “Единая Россия” фракциясынын башчысы Владимир Васильев менен жолугушууда: “Коргонууга кеткен чыгымдарды кыскартуунун эсебинен кийинки жыл үчүн бюджетти олуттуу үнөмдөө көздөлүүдө. Бул биздин армия жана флотту кайрадан жабдуу боюнча пландарыбызга байланыштуу болбойт. Биз мамлекеттин коргонуу буюртмасын аткарабыз жана жаңы программаны иштеп чыгабыз”, – деди.
Путиндин айтымында, Думада мамлекеттин негизги каржылык документин даярдоо жараянында пайда болуп жаткан маселелерди олуттуу карап чыгуу керек.
“Бул коргонууга, коопсуздукка, экономикага, экономиканы колдоп-кубаттоого, социалдык тармакка, саламаттыкты сактоо, жана жарандардын кирешесине тиешелүү. Буга көңүл бурууну сураймын”, – деп кошумчалады.
Туркистон:
Американын Россия үстүндөгү 25 жылдык стратегиясы аяктап барууда. АКШ Россиянын мурунку Советтер Союзунан калган саясий элитасын Путиндин командасы аркылуу жок кылды. Анын ордуна алсыз жетекчилерден турган ач көз, жалаң гана жеке кызыкчылыгын көздөгөн элитаны алып келүүгө шарт түзүп берди. Натыйжада, Россия оор өнөржайынан, андан соң жеңил өнөржайынан да айрылып, энергетикалык ресурстарды сатуу менен күн көрүп жаткан сырьё базасына айланып калды. О.э. Батыштын өнөржай продукцияларынын базарына айланып калды. Калкын болсо, көптөгөн жылдардан бери резервдик фонддон дотация кылуу менен багып келди. Путиндин режими ушундай жол аркылуу экономикалык кризисти жаап-жашырмакчы болду.
Эми Россиянын резервдик фонддогу валюталары да түгөнөйүн деп калды. Путин саясий элитаны жана жарандарды “Трамп бийликке келгенде АКШнын Россияга карата мамилеси өзгөрөт” деп бир топ убакытка алдап келди. Бирок, АКШны президенттер эмес, жетекчи топ учурдагы саясий элита аркылуу башкарышын Путин жакшы билет эле. Ошого карабастан, АКШнын кызыкчылыгын коргоп, Россиянын резервдик фондунуна зыян жеткиришин эсепке албастан Сирияга аскерий күчтөрүн алып кирип кыргын салды. Украинада болсо, саясий башаламандык пайда кылуу үчүн өтө чоң күч жумшап жатат. АКШ анын ушунча аракеттерин эсепке албады жана татыктуу көрүнүштө сыйлабады. Себеби, капиталисттик системада мамлекеттерди жалаң гана кызыкчылык башкарат
Путиндин жогорудагы чечиминен, ал Россиянын стратегиясын өзгөртүп жатканын түшүнүүгө болот. Т.а. орус армиясын эл аралык аскерий машина катары көрсөтүп, АКШ үчүн атаандаштарын коркууда кармап турууга кызмат кылуу стратегиясынан баш тарткандай болуп жатат. Бул нерсе Путин жүргүзүп жаткан саясаттан күтүлүп жаткан абал эле. Т.а. ал мамлекеттин ичкерисинде экономикалык кризис өкүм сүрүп турган учурда, аскерий жүрүштөр уюштуруу менен өзүн дүйнөлүк жетекчи мамлекет катары көрсөтмөкчү болду. Бирок, бул куру жана жасалма аракеттер үчүн аскерий тармакты көпкө каржылай албастыгы анык болчу.
