Атамбаев саясатта кала турган болду
Эки жылдан бери, президенттиктен кеткенден кийин саясатта калбастыгын, чыгармачылык менен алектенишин айтып келген Алмазбек Атамбаев 28-февралда Россия президенти Владимир Путин менен жолугушкандан кийин чечимин өзгөртүп, саясатта каларына ишара кылган эле.
Бүгүнкү күнгө келип болсо, президенттиктен кеткенден кийин да саясатта кала тургандыгын ачык айта баштады.
Алмазбек Атамбаев 24-мартта Бишкекте болуп өткөн маалымат жыйынында саясатта калуу үчүн сөзсүз бир кызматта болуу шарт эместигин айткан.
Ал: “Сен саясат менен алек болбосоң, саясат сени менен алектенет” деген сөздү эстей жүрүш керек. Мен премьер-министрдин же парламент спикеринин кызматын ээлейин деген ниетим жок. Эгерде кызматта калууну кааласам, таптакыр башкача референдум өткөрмөкмүн. Кошуна мамлекеттердин президенттери мени көндүрмөкчү болушкандай эле, калктын 80 пайызы да Атамбаев экинчи мөөнөткө президент болуп шайлансын деп добуш бермек. Калгым келсе калмакмын. Бирок, бизде кыйла бышык, премьер-министр, президент, спикер болуп иштегиси келген саясатчылар жетиштүү деп ойлоймун”,- деди.
Анын айтымында, өзүн колдогон КСДП партиясын “жаңыртып”, “тазалап” чыгат.
“Ага көп күч жумшалган, ал жаңырып тазаланышын каалайт элем.Бирок, мен кайсы бир кызматка турушумдун кереги жок”, – деп сөзүн жыйынтыктады Атамбаев.
