Назарбаев: Мирзиёев бардык тоскоолдуктарды алып таштады
Казакстан президенти Нурсултан Назарбаев Өзбекстандын жаңы жетекчиси соода тармагындагы тоскоолдуктарды алып, бардык мүмкүнчүлүктөрдү ачкандыгын айтты.
Казакстан жетекчиси бул тууралуу Шавкат Мирзиёевдин Астанага сапаыр учурунда билдирди.
“Тengrinews” агенттигинин билдиришинче, акыркы айларда эки мамлекеттин алакалары өзгөргөн.
Назарбаев: “Акыркы беш айдын ичинде эле өлкөлөр ортосундагы товар алмашуу эки тараптан тең 30%га өскөн. Төрт соода үйү ачылып, буудай 30%га, өзбек жашылча-жемиши 25%га көбүрөөк келди, буга чейин мындай болгон эмес. Мунун баары Өзбекстандын жаңы жетекчисинин бардык соода мүмкүнчүлүктөрүн ачып,тоскоолдуктарды алгандыгынын аркасында мүмкүн болуп турат”, – деди.
Казакстан президенти ошондой эле бүгүнкү күндө эки өлкө ортосунда чечилбеген прооблема жок экендигин белгиледи.
Назарбаев Мирзиёевди “чыдамсыздык менен күткөндүгүн” жана эки тараптуу алаканы өнүктүрүүдө анын өзүнө сүйөнө тургандыгын билдирип: “Келечек, экономикалык өнүгүү, маданий-гуманитардык тармактарда Өзбекстандын кызматташтыгынан үмүттөнөбүз, бул жаатта жеке өзүңүзгө сүйөнөбүз”, – деди.
Назарбаев суу запасы регион калктарынын жалпы мүлкү экендигин жана кошуналардын тынчсыздануусун түшүнө тургандыгын айткан.
Анын айтымында, Казакстан менен Өзбекстан дарыялардын төмөнкү агымындагы кошуналардын кызыкчылыктары эсепке алынган чечим жолундагы кызматташтыкка даяр.
Назарбаев менен Мирзиёев эки тараптуу алакалар жана регионалдык кызматташтык боюнча бир катар келишимдерге кол коюшкан.
Президент Мирзиёевди Астана сапарында 300гө жакын мамлекеттик кызматкер коштоп барган.
Ал өзүнүн Казакстанга болгон алгачкы сапарына “тарыхий сапар” деген баа берип: “Биз дайыма Казакстанды эң жакын, ишенимдүү коңшу катары эсептеп келебиз. Менин алгачкы сапарларымдын бирин Астанага жасаганым эле көп нерсени айтып турат”, – деди.
