Роухани: Иран Трамптын ядролук келишим боюнча ар кандай чечимине даяр
Ирандын президенти Хасан Роухани АКШнын ядролук келишим боюнча ар кандай чечимине жооп кайтарууга даяр экендигин билдирди.
“Эмдиги апта биздин жашообузга эч кандай өзгөрүүлөрдү алып келбейт. Трамп кандай токтом кабыл алышына карабастан, биздин өз пландарыбыз бар жана биз ага жооп кайтарууга даярбыз”, – деди Роухани Себзевар шаарынын калк менен жолугушуу учурунда.
Ирандын президенти эгерде АКШ ядролук келишимден чыкса буга өкүнүп каларын баса белгиледи.
Эске сала кетсек, Иран дүйнөнүн алты ири державасы (АКШ, Кытай, Франция, Россия, Британия,Германия) менен 2015-жылдын 14-июлунда кол койгон келишимге ылайык,ядролук программасын чектөөгө көнүп, мунун ордуна ага каршы киргизилген эл аралык санкциялар жоюлган эле.
АКШ президенти Дональд Трамп Британия, Германия жана Франция менен талкуулардан кийин 12-майдан кечиктирбеcтен, Американын аталган келишимде калышы же калбастыгын жарыя кылат.
