Назарбаев Коопсуздук кеңешинин жыйынын өткөрдү
Казакстан президенти Нурсултан Назарбаев Коопсуздук кеңешинин жыйынын өткөрдү. Бул тууралуу Ак ордо маалымат кызматы кабар таркатты.
Жыйында 2017-2020-жылдарга белгиленген улуттук коопсуздук стратегиясын ишке ашыруу маселелери, Казакстандын түштүгүндөгү облустардагы саясий, социалдык, экономикалык абал талкууланды.
Назарбаев өткөн жылы кабыл алынган стратегияга карата коркунучтарды аныктоо жана аларга каршы чараларды кабыл алууга мүмкүнчүлүк берүү керектигин белгилеп өттү.
“Өткөн жылы улуттук коопсуздукту сактоо боюнча программаны бекиттик. Улуттук коопсуздук коргонуу же ички саясатка гана тиешелүү эмес. Балким, бардык тармакты, айрыкча экономика тармагын, өсүп келаткан муунду тарбиялоону да өз ичине камтышы керек”,- деди Казакстан президенти жыйында.
Жыйында Казакстандын түштүгүн экономикалык, социалдык жактан өнүктүрүү, аймакта жаңы иш орундарын түзүү, инфраструктураны бекемдөө, авариялык мектептерди оңдоо жана жаңыларын куруу, диний экстремизмге каршы күрөшүү маселелери талкууланды.
Назарбаев жыйындын соңунда борбордук жана аймактык башкармалыктарга бир катар тапшырмаларды берди.
