Курбан Айт намазы себепсиз, шылтоосуз аянтта окулбай турган болду
6-июнда Курбан айт майрамына байланыштуу айт намаз жума окулуучу мечиттерде өтөт. Муфтияттын билдирүүсүндө айт намаздын борбордук аянтта окулбашына эч кандай шылтоо же себеп көрсөтүлгөн эмес.
Кыргызстан бийлигинин бул иши – мусулмандарды ибадаттан тосуу жана аларды көзөмөлгө алуу үчүн бир ыкма болуп эсептелет. Анткени, акыркы жылдары Кыргызстанда айт намаздарына катышкан мусулмандар эсеби жалпы калктын санына салыштырмалуу абдан көбөйүп бараткан. Башкалаанын өзүндө эле жүз миңдеген адамдар намазга катышып, мындай көрүнүш өкмөт ичиндеги Исламга каршы кызматкерлердин кыжырын келтирчү.
Мындан тышкары, бир жылда эки жолу окулуучу Айт намаздары коомчулук канчалык деңгээлде исламдашып баратканынын да көрсөткүчү болуп калган. Бул көрсөткүч кыргыз бийлигин эле эмес, алардын кожоюну болгон колонизаторлорду жана алардын колу-бутуна айланган эл аралык уюмдарды да тынчсыздандырып жатканы талашсыз. Ошондуктан, бул уюмдар кыргыз өкмөтүнө миллиондогон долларларды мына ушул исламдашуу жараянын чектөө үчүн берип келет. Өкмөт болсо ушул каражаттарды актоо үчүн жасалма коркунучтарды ойлоп таап, Исламий баалуулуктарга каршы күрөштү күчөтүп барууда. Бул күрөш аркылуу бийликтин көзөмөлүнөн сыртта калган мусулмандар чөйрөсү үстүнөн орган кызматкерлеринин көзөмөлүн күчөтүп алмакчы болууда.
Көңүл ачуучу иш-чараларга он миңдеген адамдар тоскоолдуксуз чогулуп жаткан чакта, аянттарда намаз окууга тыюу салуу эки жүздүүлүктөн башка нерсе эмес. Андыктан, бийлик ээлери айт намазы өтөлүшүнө чектөө киргизүү менен өздөрүнө жүктөлгөн жоопкерчиликти аткарбай, күнөөкөр болууда. Демек, биз мусулмандар бийлик ээлеринен мына ушул иштердин аткарылышын талап кылып, Ислам баалуулуктарын, өкүмдөрүн тебелеп-тепсөөгө жол бербешибиз шарт!
Мумтаз Маверанахрий
