Орусия темир жол долбооруна 200 миллион рубль бөлдү
Кытай-Кыргызстан-Өзбекстан темир жолунун техникалык-эконимикалык негиздемеси даярдалды. ТЭКти даярдоого Орусия 200 миллион рубль бөлүп берген. Бул тууралуу президент Сооронбай Жээнбеков Коомдук телеканалдагы маегинде билдирди.
Анын айтымында, учурда эксперттик топтор иштеп жатат. Аталган долбоорго Кытай тарап да, Орусия да макул болгон.
Белгилей кетсек, темир
жолду куруу боюнча демилгелер Өзбекстанда бийлик алмашкандан бери күчөп,
сүйлөшүүлөр жанданган. Кыргызстанды Кытай менен
байланыштырган темир жол куруу демилгеси 10 жыл мурун көтөрүлүп, ага 6-6,5
млрд. доллар каражат кетери болжолдонгон. Бирок бул долбоор стратегиялык жактан
Орусиянын кызыкчылыгына каршы келгендиктен, улам артка сүрүлүп келген.
Бүгүнкү күнгө келип, Орусия кызыкчылыктары да
киргизилүү менен келишүүгө жетишилип олтурат. Мындай келишим Орусия президенти Путиндин Кыргызстанга
болгон расмий визитинин алкагында түзүлгөн. Ага ылайык, техникалык-экономикалык
негиздемени орус компаниясы
“Кыргыз темир жолу” мамлекеттик ишканасы менен бирге түзө турган болгон.
Демек, Орусия Кытайдын “Бир алкак – бир жол”
стратегиялык долбооруна кошулуу менен эл аралык абалда Кытай кызыкчылыгына ээрчүүдө. Ал эми Кытайдын
дымагы Орусияныкынан да күчтүү болуп, стратегиялык долбоорун ишке ашырууда
Борбор Азия өлкөлөрүн өз кызыкчылыгында пайдаланып, экономикалык жактан кишенге
салып барууда.
Мумтаз Маверанахрий
