АКШ Орусияга каршы жаңы санкцияларды киргизүүгө убада берди
АКШ каржы министри Стивен Мнучин Орусияга каршы жаңы санкциялар 30 күн ичинде киргизилишин маалымдады. Бул тууралуу РИА Новости кабар таркатты.
“Биз бардык бар санкцияларды ишке ашырабыз жана жаңыларын киргизебиз”,- деди министр.
Январь айынын акырында, АКШ каржы министрлиги “Кремл доклады” деп аталган документти жарыялаган. Эртеси күнү Мнучин сенаттын угуусунда болуп, жаңы санкциялар киргизилиши тууралуу суроого анык күндөрдү айткан эмес. Ал өз сөзүндө этияттыкка чакырып, “али көп иш кылынышы лаазым” экенин белгилеген.
“Мен сиздерге бул санкция ушул ай ичинде ишке ашат деп убада бере албайм. Бирок, ишендире кетейин, биз муну мүмкүнчүлүк болушунча тез убакытта, бир нече ай ичинде, балким бир ай ичинде ишке ашырабыз”,- деген Стивен Мнучин.
Орусияга каршы дагы да катаал чараларды киргизүү талабына жооп берген Мнучин: “Сыр эмес, биз ишке ашырышыбыз керек болгон маселелер бар. Биз аларды санкциялар жардамында ишке ашырабыз”,- деген.
Учурда АКШ Крымдагы абал, Донбасстагы кырдаал жана шайлоолорго “аралашкандык” себептүү Орусияга бир катар санкцияларды кабыл алууга даярдык көрүүдө, же кабыл алынган, деп жазды РИА Новости.
