КМШ өлкөлөрүнүн атайын кызматтарынын жетекчилери Москвада жолугушат
КМШ өлкөлөрүнүн терроризмге каршы күрөшүү түзүмдөрүнүн жетекчилери Москва облусунун Одинцово шаарында глобалдык терроризм коркунучу боюнча бирдиктүү иш алып баруунун багыттарын макулдашуу үчүн жыйналышат. Бул тууралуу КМШнын терроризмге каршы күрөшүү борборунун маалымат бюросу кабар таркатты.
Жыйынга КМШ өлкөлөрүнүн коопсуздук органдары, атайын кызматтары, шериктештиктеги ушул тармакта кызматташкан органдар, эл аралык уюмдар жана Орусиянын бир катар өкүлдөрү катышаары пландаштырылган.
“КМШнын терроризмге каршы күрөшүү борбору Одинцова шаарында шериктеш мамлекеттердин терроризмге каршы күрөшүү боюнча улуттук борборлорунун жетекчилери катышкан жыйын өткөрөт. Быйыл XI жолу өткөрүлүп жаткан кеңеш “Шериктеш мамлекеттердин терроризмге каршы күрөшүү боюнча компетенттүү органдары ортосунда кызматташтыктын учурдагы багыты” темасы астында өткөрүлөт”,- деп айтылат кабарда.
Күн тартибинде заманбап баскычта террордук коркунучтарды баалоо каралган. Айрыкча, Сирия-Ирак аймагында глобалдык терроризм коркунучу өзгөрүп жаткандыктан ага карата пландар, эл аралык террордук уюмдардын башка аймактарга кирип баруу ыктымалдары, КМШ өлкөлөрүнүн тышкы чегараларында террордук коркунучтун ыктымалдуу түрлөрү талкууланат.
Жыйындын катышуучулары, тийштүү коопсуздук органдары согуш майдандарында жүргөн эл аралык террорчулар мамлекеттрине кайтып келсе өз ара кызматташуу багыттарын да белгилеп алышат.
2018-жылга белгиленген КМШнын терроризмге каршы бирдиктүү машыгууларын өткөрүүгө да өзүнчө этибар каратылат.
