Индонезия студенттеринин көпчүлүгү Халифалык мамлекетинин тарапкери
Индонезияда сурамжылоо көрсөткөндөй, мамлекеттеги мектеп окуучулары жана университет студенттеринин көпчүлүгү азыркы илманий (светтик) демократиялык башкаруунун ордуна Халифалык мамлекети тикеленишин каалашат.
Россиянын араб тилинде чыгуучу “arabic.rt.com” сайты “Рейтер” маалымат агенттигине таянып кабарлагандай, башкы кеңсеси Жакартада жайгашкан “Алвара” уюму мамлекет калкынын дээрлик жарымы жашаган Ява аралындагы мектептер менен университеттерде сурамжылоо өткөрүшкөн. Сурамжылоого катышкан 4200 студенттин 20% дан көбүрөөгү Халифалык мамлекетин тикелөө үчүн аракет кылууга даяр экендигин билдиришкен.
Аталган отчёт Индонезия бийлигин окуу жайларда күчөп бара жаткан – Батыштын тили менен айтканда – Исламий “экстремисттик” идеялардын таасиринен эскертти.
“Бийлик жана муътадил (мээлүүн) Исламий уюмдар мунун алдын алуу үчүн жана студенттер жамаатын мындан кайтаруу үчүн олуттуу аракет кылышы керек. Бул жаатта студенттер менен алар түшүнө турган тилде сүйлөшүү керек”, – деген сунуш берилет өткөн шейшемби күнү жарыя кылынган отчётто.
“Arabic.rt.com” сайтынын кабарына таянсак, Индонезиянын президенти Жоко Видодо жана анын бийлиги университеттер жана мектептерде “экстремисттик” топтордун таасири күчөп жатышын токтотууга аракет кылууда.
“Мисалы, октябрь айында президент Видодонун “илманий мамлекеттин ишенимине тескери келген ар кандай уюмдарга тыюу салуу” жөнүндөгү мыйзамын парламент макулдады. Аталган жаңы мыйзам негизинде Индонезияда биринчи кезекте Хизб ут-Тахрир уюмунун ишмердүүлүгүнө тыюу салынды. О.э. президент Видодо мамлекеттик мектептерде индонезиялыктардын плюрализми (пикрилер ар түрдүүлүгү, көп партиялуулук) жана улуттук биримдигинин мааниси жөнүндө бир нече жолу сөз сүйлөдү. Өткөн жылдын сентябрь айында билим берүүгө арналган конференцияда Видодо билим берүү тармагында светтик ишенимди бекемдөөгө чакырды”, – деп жазды “arabic.rt.com” сайты.
