Өзбекстандын премьер-министри Кыргызстанга келди
Өзбекстандын премьер-министри Абдулла Арипов 16-августта жумушчу сапар менен Кыргызстанга келди.
Абдулла Ариповду “Манас” эл аралык аэропортунан Кыргызстандын премьер-министри Сооронбай Жээнбеокв күтүп алды.
Кыргызстан президентинин маалымат кызматы билдиргендей, президент Алмазбек Атамбаев “Ала-Арча” резиденциясында Абдулла Ариповду кабыл алган.
Атамбаев менен жолугушуу учурунда Абдулла Арипов Өзбекстан тарап Кыргызстан менен достук мамилени чыңдоо багытындагы иштерди мындан ары да улантууга даяр экендигин билдирген.
Кабарда келишинче, тараптар эки өлкө ортосундагы түрдүү тармактардагы кызматташуунун актуалдуу маселелерин талкуулашкан.
Алмазбек Атамбаев Өзбекстан президенти Шавкат Мирзиёевдин кыргыз-өзбек кызматташтыгын чыңдоого кошкон салымы зор экендигин белгилеп, Абдулла Ариповдун сапары достук жана жакшы коңшулаштык салттарынын, өз ара пайдалуу өнөктөштүктүн принциптерине негизделген эки тараптуу мамилелерди мындан ары да өнүктүрүүгө жаңы дем берерине ишеним билдирген.
Абдулла Арипов президент Алмазбек Атамбаевге Өзбекстан президенти Шавкат Мирзиёевден салам айтып,өлкөнүн жетекчилиги Кыргызстан менен Өзбекстандын ортосунда достук жана жакшы коңшулаштык мамилелерин бекемдөөгө багытталган ишти мындан ары да улантууга даяр экендигин билдирди.
Туркистон: Өзбекстан Кыргызстанда президенттик шайлоодон кийин күтүлүп жаткан жараяндарга кайдыгер эмес. Бирок көңүл бурууга арзый турган жери, анын бул жараянда ээлеген позициясында.
Өзбекстан Кыргызстанда саясий туруктуулукту кармап калууга кызыкдар. Себеби, Мирзиёевдин өзбек элитасында жүргүзүп жаткан ички саясаты жана диктатордук түзүмдөн калган режимге каршы жүргүзүп жаткан саясий реформалары үчүн кошуна өлкөлөрдө коопсуздук жана туруктуулук болушу өтө маанилүү. Себеби, Каримов калыптандырган башкаруу түзүмү ар бир тармакта коопсуздук системасы негизине байланган абалда калыптандырылган. Ушундан келип чыгып, Өзбекстандагы башкаруу тизгини дээрлик Инаятов баш болгон коопсуздук кызматынын таасири астына өтүп калды. Ошондуктан, өлкөнүн ичкерисинде о.э. региондо жүз бере турган ар кандай кооптуу абалдар Мирзияев күрөшүп жаткан коопсуздук түзүмүнө пайдалуу болуп, анын таасирин ого бетер күчөтөт.
Кыргызстанда болсо, оппозициялык күчтөр канчалык күчтүү экендигине жана элита өкүлдөрүнүн көпчүлүгүн өздөрү тарапка тартып алышына карабастан, алардын көпчүлүгү Россиянын колдоосунан үмүткөр болуп турушат. Себеби, Кыргызстанда Батыш системасынын таасири өтө эле алсыз о.э. Кыргызстанга кайдыгер карап жатат.
Россия болсо, азырынча Атамбаев тандаган Жээнбековду колдоого убада берип жатат. Ошондуктан, Өзбекстан да кадыржам позиция деп Россияга парралел багытта жүрүүнү ыктыяр кылды. Себеби, региондогу ар кандай революциялык аракет же тополоңдордун бардыгы эки лагерге бөлүнгөн эл аралык күчтөрдүн кызыкчылык талашуусу себептүү башталат. Өзбекстан болсо, эл аралык саясатка таасир өткөрө ала турган өлкө эмес. Ошондуктан, ал Россиянын ыктыярына тескери баруудан эч кандай пайда таппастыгын өтө жакшы билет.
Бул ирет Батыш күчтөрүнүн Кыргызстандын ички саясатындагы кескин позициясы дээрлик көрүнбөй жатат. Муну, Текебаевди 8 жылга камап жиберүүдөгү укук бузуулардан, Батыштын саясий машинасынын негизги куралы болгон “адам укугун коргоочулар” дээрлик аралашпай жатканынан билип алсак болот. Демек, майданда Россиянын кызыкчылыгы гана калды.
Мындан тышкары Жээнбеков ар кандай күч жетелеп кетиши өтө ыңгайлуу болгон саясатчы. Атамбаев да аны ушул сапаты үчүн тандады. Өзбекстан да Жээнбековду өз максаттары жолунда иштетүү оңой болгон саясатчы деп билүүдө. Бирок, Россия акыркы кезде позициясын өзгөртүп жибериши мүмкүн. Себеби, Россия Өзбекстанга же башка күчтөргө жетелене турган алсыз саясатчыны башкарууда көптөгөн кыйынчылыктарга дуушар болот. Ушундан келип чыгып, Путиндин саясатта бышып жетилген, бир аз көз карандысыз позиция жана принцип ээси болгон башка бир саясатчыны тандашы күтүлүүдө. Ушундан үмүткөр болгон саясатчылар Москва астанасына баш уруп барышууда.
