Түркиядагы 100 миң сириялыкты өз мекенине кайтаруу долбоору
Түркиянын социалдык саясат жана үй-бүлө иштери боюнча министрлиги БУУнун Качкындар боюнча жогорку комиссары менен кызматташтыкта сириялык качкындарды өз мекенине кайтаруу жөнүндөгү мыйзам долбоорунун үстүндө иштеп жатат. Аталган долбоор үстүбүздөгү жылдын аягына чейин 100 миң сириялыкты мекенине кайтаруу маселесин камтыйт. Бул тууралуу Түркияда чыгуучу “Хурриет” гезити кабарлады.
Гезиттин кабарына таянсак, Түркия күчтөрү “Азат Сирия армиясы” менен биргеликте Сирия түндүгүндө ишке ашырган “Ефрат калканы” операциясынын жүрүшүндө эки миң квадрат километр жерди ИШИМдин колунан азат кылган. Эми сириялык качкындарды өз мекенине кайтаруу маселеси турат.
“Хурриет”тин билдиришинче, Түркия менен БУУ кызматташтыкта даярдап жаткан долбоордун максаты 100 миң адамды Сириянын аль-Баб шаарына кайтаруу үчүн ал жерде зарыл болгон шарттарды түзүү. Эки тараптын демилгеси менен дүкөндөр, нан бышыруучу жайлар ачылып, калк таза суу менен камсыздалат жана жергиликтүү мектептер менен ооруканалар кайрадан тикеленет.
Статистикалык маалыматтар боюнча, Сириядагы согуш себептүү үй-жайын таштап Түркияга качып өткөн сириялык качкындардын саны 3,5 миллионго барабар.
