Украиналык аскерлер Донбасста абал курчуганын кабарлашты
Украиналык аскерлер өздөрүн аймактык түзүм катары жарыялаган “Донецк элдик республикасынын” (ДНР) өкүлдөрүн өкмөттүк кошуундардын позицияларына чабуул кылууда о.э. 2014-жылдан бери уланып келе жаткан жаңжалды күчөтүүдө айыпташты.
Донбасста жайгаштырылган №72-механизацияланган бригаданын “Би-би-си”ге билдиришинче, 31-январь күнү эртелеп ДНР өкүлдөрү келишимди аткаруу сунушун киргизип, кийинчерээк күтүүсүздөн чабуулга өтүшкөн.
Бригаданын кабарлашынча, чабуулдун алдында, жергиликтүү убакыт менен эртең менен саат 7де Авдеевка районуна замбиректен ок атылган. Украиналык аскерлердин билдиришинче, ошондон кийин ДНР өкүлдөрү чабуул кылышкан.
Бригаданын маалымат катчысы Елена Мокренчуктун билдиришинче, чабуул токтотулган, бирок ок атышуулар уланууда. Бригада жекшембиден бери уланып жаткан атышуулардан жети адам өлгөндүгүн тастыктады.
Донецктин башчысы Павел Жебривский да жаңы чабуул тууралуу кабарлады. Анын айтымында, учурда ДНР өкүлдөрү менен ок атууну токтотуу туурасында сүйлөшүүлөрдү жүргүзүүдө.
Стратегиялык жактан мманилүү пункт болуп эсептелген Авдеевка району аймактагы эң кандуу чекиттердин бири болуп калууда. Аскерлердин маалыматына ылайык, ага “Град” деп аталган реактивдик снаряддан жана танктардан ок атышууда.
ДНРдин өзүндө болсо жаңжалдын күчөшүнө украиналык аскерлерди айыпташты. ДНР өкүлдөрү төрт согушкери курман болгондугун о.э. Украина жоготууларын азайтып көрсөтүп жаткандыгын билдиришти.
Украинанын президенти Петр Порошенко мамлекеттин чыгышында абалдын курчушу себептүү 31-январдагы Германия сапарын токтотту.
Жергиликтүү өкмөт ок атышуулар себептүү электр тармагына зыян жетип, Авдеевканын 25 миңге чукул калкы жарыксыз калганын кабарлады.
Порошенконун курамы Украина, Россия жана ЕККУдан турган үч тараптуу топтун кезектен тышкаркы жыйынын чакыруусу күтүлүүдө. Бул жолугушуу 1-февралга пландаштырылган болчу, бирок, 31-январда болушу мүмкүн экендиги кабарланды.
Маалымат катары айта кетсек, стратегиялык жактан маанилүү болгон Авдеевкадагы абалдын курчушу 29-январга өткөн түнү жүз берген. Тараптар бул окуяда бири-бирин айыпташууда. “Рейтер” агенттиги Украина аскерлери бир жарым айдын ичиндеги эң чоң жоготууга учурагандыгын билдирген.
