Россия президенти Владимир Путин Улуттук гвардия түзүлө тургандыгын жарыя кылды. Бул гвардия Россия ички иштер министрлигине караштуу Ички кошуундардын базасында түзүлөт. Путиндин айтымында, Улуттук гвардия терроризмге жана уюшкан кылмыштуулукка каршы күрөшөт о.э. “ОМОН, СОБР жана башка бөлүктөрдүн милдеттерин аткарат”.
О.э. Федералдык миграция кызматы (ФМС) жана наркотикалык заттарды көзөмөлдөө федералдык кызматы ички иштер министрлигине моюн сундурулат.
Путин укук-коргоо органдарындагы реформаларды ички иштер министри Владимир Колокольцев, наркотикалык заттарды көзөмөлдөө кызматынын башчысы Виктор Иванов, ички иштер министрлигинин ички кошуундарынын командачысы Виктор Золотов жана ФМС башчысынын орун басары Екатерина Егорова менен жолугушуусу учурунда жарыя кылды.
Туркистон: Путин Россияда өз режимин күчөтүп, мамлекетти бүтүндөй диктатордук режим астында кармап калмакчы. Улуттук гвардия граждандык согушка алып барышы да мүмкүн. Бирок, Путинди азыр орус калкынын тагдыры көп деле кызыктырбайт. Ал өзүн жана режимин сактап калуу үчүн ар кандай ишке даяр турат.
Улуттук гвардия жана анын мигранттар маселесине киришүүсү, наркотикалык заттарга, терроризмге каршы күрөшүүсү, булардын баары Сталиндин репрессивдик аракеттерин эске түшүрөт. Алар кубатка ээ болору менен мамлекеттин эң ыпылас иштерин расмий түрдө ишке ашыруучу апаратка айланышат. Аларга бир катар укуктар берилип, режимге жакпаган күчтөрдү жок кылуу иштери жүктөлөт. СССР қулап бара жатканда мамлекет тарабынан атайын түзүлгөн скинхеддер сыяктуу улутчул маанайдагы кылмыштуу уюмдар бүгүнкү күнгө чейин бар. Улуттук гвардия аларга кошумча кубат болушу менен бирге, чоӊураак мүмкүнчүлүккө ээ болгон расмий улуттук аракет болуп эсептелет. Алар коомду улуттук жактан тазалоо иштеринен тышкары, саясий жактан керексиз элементтерден да тазалоо иштерин жүргүзүшөт. Мындан тышкары, алардын агитация, пропаганда иштерин да алып барышы күтүлүүдө.
КМШ мамлекеттерине да бул бир эскертүү болот. Алар эми өз граждандарынын көпчүлүк бөлүгүн кайрадан кабыл алышат. Путин Россия алдан тайып бара жатканын билет. Резервдик фонддогу акчалар түгөнүп бара жатат. Россиянын экономикалык абалы болсо күндөн күнгө начарлап баруда. Мындайда Россия жарандарынын жашоо деӊгээли кескин төмөндөйт. Бул болсо, аларга жаӊы жумуш орундарын даярдап берүүнү талап кылат. Улуттук гвардиянын ушул иш менен да алектениши т.а. өз жарандарынын муктаждыгына карай жумушчу орундарын бошотуп берүү менен да алектениши күтүлүп жатат.
