Россия кризиске даярданууда

 Россия президенти Владимир Путин элди мамлекеттин экономикасы акырындык менен кризистен чыгып, туруктуу болуп бара жатканына ишендирүүгө аракет кылып жаткан болсо да, кырдаал күн сайын изден чыгып барууда. Муну, ал тургай Путиндин командасындагы адамдар да моюнга алууда.

 13-январь күнү болуп өткөн VII Гайдар форумунда сөзгө чыккан премьер-министр Дмитрий Медведев нефтинин баасы түшүп кете берсе экономикалык абал начарлашына даярдык көрүүнү сунуштады.

“Чогулган резервдер  себептүү үстүбүздөгү жылдын бюджетин баланста кармап турууга мүмкүнчүлүк болду. Бирок,нефтинин баасы төмөндөп бара берсе, бюджет параметрлерин  аныктоого туура келет. Түшүнүү керек болгон нерсе, эң жаман сценарийге даяр турушубуз керек”, – деди Медведев.

Ушул форумга катышкан Россиянын финансы министри Антон Силуанов да, эгерде Россия федералдык бюджети жаңы экономикалык жана финансылык шарттарга ылайыкташтырылбаса 1998-жылы болгону сыяктуу, бардык чыгымдар карапайым калктын  мойнуна түшүүсүнөн эскертти.

“Бүгүнкү абалда өтө үнөмдүү, катуу бюджет саясаты тууралуу сөз кылуу керек. Мына ошондо дефицит деңгээли мынчалык көтөрүлүп кетпей, карыздын көлөмү да көбөйүп кетпейт”, – деди финансы министри.

Анын айтымында, учурда Россиянын карыздары өтө көп, ошол себептен улам пайыздык чыгымдар бюджеттин манёврларын чектеп коёт.

Россиянын экономикалык өнүгүү министри Алексей Улюкаев болсо, нефтинин баасы ондогон жылдар бою ушинтип турушуна ишара кылды.

Форумда сөзгө чыккан Алексей Улюкаев: “Россия сыяктуу сырьёго негизделген экономикалар үчүн сырьёнун арзан болушу доору көпкө созулат. Бул сырьё айланышынын глобалдык төмөн баскычыбы, же жаңы абалбы, айтуу кыйын. Бирок, мен бул доор өтө көпкө созулушуна ишенемин”, – деди.