2014-жылдын июль айында “Израиль террорчу мамлекет” деп билдирүү берген Түркия президенти Режеп Таййип Эрдогандын бүгүнкү күндө Израиль мамлекети жана яхудий жамааттар менен жакындашып бара жатканы күзөтүлүүдө.
Президент Эрдоган Түркиядагы яхудийлер жамаатынын өкүлдөрүн Мабейн президенттик сарайында кабыл алды.
Президентке караштуу булактар таркаткан кабарларга ылайык, жолугушууга башкы раввин Исхак Халева, Түркия яхудий жамаатынын жетекчиси Исхак Иброхимзада жана Түркия яхудий коомунун ардактуу президенти Бенсиян Пинтолор келишкен.
Жолугушууда Түркиядагы яхудий коомунун диний жетекчиси башкы раввин Исак Халева акыркы жылдарда яхудий диний жамааттардын укуктары боюнча ташталган кадамдар себептүү президент Эрдоганга ыраазылык билдирди. Президент Эрдоган жана яхудий делегациясынын ортосунда достук маанайда болуп өткөн жолугушууда алар Жакынкы Чыгышта да тынчтык орношунан үмүттөнгөнүн билдиришти.
Эскерте кетүүчү нерсе, 2004-жылдын январь айында AJC жана ADL (АКШ яхудийлер комитети) тарабынан Түркия президенти Режеп Таййип Эрдоганга “Эрдик” сыйлыгы тапшырылган. Яхудийлердин диний принциптери боюнча, бул сыйлык Израилге жогорку даражада кызмат көрсөткөн адамга берилет. Изилдөөчү Салим Котилдин билдиришинче, бул сыйлык Эрдоганга чейин 100 жылдын ичинде израилдик 10 саясатчыга гана берилген. 11-орунда “Эрдик” сыйлыгына ээ болгон Эрдоган Түркия боюнча эле эмес, дүйнө жүзү боюнча жогорудагы сыйлыкка ээ болгон эң биринчи мусулман болду.
